Sofje, Asambleja Parlamentare e NATO-s sot vendos për statusin e Kosovës

Sot Asambleja Parlamentare e NATO-s që po zhvillohet në Sofje pritet të vendos për avancimin e statusit të Kosovës në këtë organizatë, në anëtar të Asociuar.

Deputetët që përfaqësojnë Kosovës në këtë Asamble, Driton Hyseni dhe Xhavit Haliti, janë shprehur optimistë se epilogu do të jetë pozitivë. Ndërkohë delegacioni i Parlamentit të Serbisë përmes një letre, i ka kërkuar kësaj Asambleje që të mos i japë Parlamentit të Kosovës statusin e anëtarit të Asociuar.

Delegacioni serb në takim me kreun e delegacionit amerikan në NATO, Michael Turner, i dorëzoi një letër nga Kryetarja e Parlamentit të e Serbisë, Ana Brnabiç, përmes së cilës i bëhet thirrje anëtarëve të Asamblesë Parlamentare të NATO-s të mos miratojnë avancimin e statusit të Kosovës nga Vëzhgues në anëtar të Asociuar.

Asambleja Parlamentare e NATO-s, ku Kosova synon të avancojë statusin e saj, është institucionalisht e ndarë nga NATO, por shërben si një lidhje e rëndësishme mes NATO-s dhe parlamenteve të vendeve anëtare. Ajo përbëhet nga 281 delegatë nga të 32 vendet anëtare të NATO-s. Përveç tyre, në aktivitetet e saj marrin pjesë edhe delegatë nga 9 vende të asocuara, 4 vende të asociuara mesdhetare, si dhe 8 delegacione vëzhguese parlamentare.

Anëtarët e asociuar mund të paraqesin rezoluta dhe ndryshime në rezoluta. Gjithashtu, mund të shërbejnë si raportues specialë të asociuar në komitete, për të paraqitur perspektivat e tyre në raportet NATO-Asamble Parlamentare. Por, ata nuk kanë të drejtë të votojnë për raportet, rezolutat apo udhëheqjen e Asamblesë dhe as nuk kontribuojnë në buxhetin e saj.

Aktualisht, anëtare të Asocuara janë nëntë, në mesin e tyre edhe Serbia dhe Bosnje Hercegovina.