Sofje, Borisov dhe Zaharieva anulojnë takimet me Gjorgje Ivanovin

Kryeministri bullgar, Bojko Borisov dhe ministrja bullgare e Punëve të Jashtme, Ekaterina Zaharieva kanë anuluar takimet me presidentin e Maqedonisë, Gjorgje Ivanov.

“Nuk duam të përzihemi në punët e brendshme të fqinjit tonë. Qëndrimi ynë është parimor dhe i qartë si dhe i gjithë bashkësisë ndërkombëtare. Qeveria bullgare nuk sheh arsye të shfrytëzohet për debate të brendshme politike në Shkup. Thelbësore, për zhvillimin e ardhshëm të shtetit tonë fqinj është integrimi në BE dhe NATO dhe kjo të mos vihet në pikëpyetje”, theksoi qeveria e Bullgarisë përmes komunikatës.

Ndryshe, Presidenti i Maqedonisë, Gjorgje Ivanov ka filluar sot një vizitë zyrtare në Bullgari. Sipas paralajmërimeve nga kabineti i tij, përveç se me homologun e tij bullgar, Rumen Radev, në Sofje duhej të takohej edhe me Borisovin dhe Zaharievën.