Sokol Mëngjesi në koma, Shefi Urgjencës: Nëse gjendja do jetë stabël, do të tentohet për zgjim!
Avokati dhe pedagogu i njohur Sokol Mëngjesi i cili u dhunua dje nga tre barbarë vazhdon të jetë në koma ndërsa Shefi i Urgjencës te Spitali i Traumës, Gjovalin Bushi, duke folur sot për gjendjen e tij shëndetësore tha se pacienti ka dëmtime të shumta në kokë dhe orët në vijim janë vendimtare, nëse gjendja do jetë stabël, do të tentohet edhe zgjimi.
“Nga momenti i djeshëm e deri më sot gjendja thuajse është stabël, megjithëse duhet ta themi se pacienti vazhdon të jetë në gjendje të rëndë. Ka dëmtime të mëdha në kokë. Dje i është bërë një ndërhyrje e vogël nga pjesa e neurokirurgëve. Në ekzaminimin që është bërë sot në mëngjes është konstatuar se ka një ulje të edemës, e cila është ndër faktorët kryesorë që e rëndon gjendjen e pacientit.
Në këto kushte, pacienti nuk ka nevojë që të kryhet ndërhyrje urgjente kirurgjikale. Nga parametrat është stabël, por pritet sesi do të reagojë më vonë. Duhet të paktën 72 orë që të shihet momenti i parë sesi do të reagojë,” tha doktor Gjovalini duke folur dhe për momentin kur mund të tentohet edhe zgjimi:
“Pacienti duhet ndjekur vazhdimisht, nëpërmjet ekzaminimeve imazherike. Shpresoj të kemi një përmirësim të edemës, megjithëse ka edhe dëmtime të tjera. Është nën kujdes dhe nën monitorim të vazhdueshëm. Nga të dhënat që kemi nga ekipi i mjekëve që e monitorojnë, nuk ka nevojë për ndërhyrje kirurgjikale. Shpresoj të vijojë ky ritëm, që gjendja të jetë stabël dhe të tentohet për zgjim. Pacienti ka edhe shtypje të trurit. Orët në vijim janë vendimtare.”
Ndryshe, dje rreth orës 08:50, në zonën e ish-Bllokut në Tiranë, tre persona i zunë pritë dhe e sulmuan me grushte dhe sende të forta profesorin e njohur të Fakultetit të Drejtësisë dhe avokatin e Kryetarit të PD, Sali Berisha, ku për pasojë Sokol Mëngjesi pësoi frakturë në kokë dhe dëmtime te zona e ballit dhe pas kokës. Nga këto goditje gjendja e avokatit Sokol Mëngjesi me dëmtime në pjesën e trurit dhe hemorragji u përkeqësua dhe ai në Spitalin e Traumësu fut në intubim dhe sot vazhdon të jetë në koma.
