Solanës i ndalohet hyrja në SHBA. Ja arsyeja..

Shtetet e Bashkuara i kanë ndaluar hyrjen në këtë vend Ish-Sekretarit të Përgjithshëm të NATO-s, Javier Solana pasi që kishte realizuar një udhëtim në Iran, shtet ky të cilin Presidenti Donald Trump e futi në listën e zezë.

Solanës, i cili duhet të mbante një ligjëratë në Institutin Brookings në Washington, i është refuzuar viza amerikane me sistemin elektronik të autorizimit “për shkak të vizitës së shtetit armiqësor”, shkruan e përditshmja spanjolle “El Pais”.

Javier Solana kishte vizituar Iranin për herë të fundit në vitin 2013, kur ishte në një takim me presidentin e Republikës Islamike, Hassan Rouhani.

Në Ambasadën amerikane në Madrid nuk komentuan rastin konkret për “El Pais”, por saktësuan se sistemi elektronik amerikan për autorizimin e udhëtimit, në mënyrë automatike e hedhë poshtë kërkesën e njerëzve të cilët kanë vizituar cilin do nga shtatë shtetet që u ndalohet udhëtimi drejtë SHBA.

Këto shtete janë: Iraku, Siria, Irani, Sudani, Libia, Somalia dhe Jemeni.

Solana e ka mohuar “El Pais” këtë incident duke shtuar se është në proces të marrjes së vizës.

Ndryshe, Javier Solana ishte Ministër i Jashtëm i Spanjës, Sekretar i Përgjithshëm i NATO-s dhe Përfaqësues i Lartë për Politikë të Jashtme dhe Siguri pranë BE.