“Solidaritet për Sigurinë Globale”, Kurti: Të zbatohen marrëveshjet e Berlinit!

Në darkën e punës në Bled e cila u organizua nga Kryeministri i Sllovenisë, Robert Golob, për liderë të rajonit dhe presidentin e Këshillit të Evropian, Charles Michel, Kryeministri i Kosovës, Albin Kurti, theksoi rëndësinë e zbatimit të marrëveshjeve të arritura vitin e kaluar në Procesin e Berlinit, ku veçoi atë për lirinë e lëvizjes.

“Më 1 janar 2024 të gjithë qytetarët e Republikës së Kosovës do të lëvizin pa viza në vendet e Bashkimit Evropian ndërkohë që do t’ju kërkohen viza për në Bosnje dhe Hercegovinë. Në këto 50 ditët e mbetura para Samitit në Tiranë, është e rëndësishme që të fillojë zbatimi i plotë i tri marrëveshjeve që kemi nënshkruar në Berlin,” tha Albin Kurti gjatë darkës së punës në kuadër të Forumit “Solidaritet për Sigurinë Globale” ku u diskutua për bashkëpunimin rajonal, anëtarësimin e Ballkanit Perëndimor në Bashkimin Evropian dhe sigurinë.

Duke mirëprit thirrjet e Kryeministrit të Sllovenisë, Robert Golob dhe Presidentit të Këshillit Evropian, Charles Michel, për fokusim në zgjerimin e Bashkimit Evropian si dhe mundësitë për vendet e Ballkanit Perëndimor, Kryeministri i Kosovës, Albin Kurti nënvizoi respektimin e pakicave dhe njohjen reciproke si parakusht.

“Bashkimi Evropian duhet të zgjerohet. Ballkani Perëndimor duhet ta mbështesë zgjerimin dhe vendet aspirante duhet të kryejnë reformat të cilat përshpejtojnë anëtarësimin.”