Sonila Bejtja emërohet në Gjykatën Kushtetuese, Yuri Kim: Falënderoj Presidentin!

Pas emërimit të Sonila Bejtjes si anëtare e shtatë e Gjykatës Kushtetuese nga ana e Presidentit të Republikës, Ilir Meta, ka reaguar Ambasadorja e SHBA në Tiranë, Yuri Kim, duke falënderuar Presidentin Meta ndërsa pret që ky proces të mos ndaloj deri sa të plotësohen 9 vendet në Gjykatën Kushtetuese.

“Faleminderit Presidentit Ilir Meta për dekretimin në këtë mbrëmje të gjyqtares së 7-të të Gjykatës Kushtetuese. Duke vepruar së bashku me urgjencë – në përgjigje të drejtpërdrejtë të opinionit të Komunitetit të Venecias, kushtit ë BE-së dhe kërkesave të popullit shqiptar – Presidenca, Parlamenti & KED mundësuan funksionalizimin e Gjykatës Kushtetuese para datës 31 dhjetor,” thekson Ambasadorja amerikane në reagimin e saj përmes rrjetit socia Twitter duke nxitur institucionet dhe kandidatët deri në plotësimin e plotë të Gjykatës Kushtetuese me 9 anëtarë:

“Presidenti, Parlamenti dhe KED kanë merita për arritjen e kuorumit + 1, por nuk mund të ndalojnë derisa të plotësohen të 9 vendet në Gjykatën Kushtetuese. Puna duhet të vazhdojë në vitin tjetër. Nxisim kandidatët e kualifikuar t’i përgjigjen detyrës në mënyrë që populli i Shqipërisë të ketë drejtësi të vërtetë, si aleatit të NATO-s dhe aspirant i BE-së.”

Ndryshe, sot Këshilli i Emërimeve në Drejtësi, KED, ka vendosur t’i dërgoj Presidentit emrin e Sonila Bejtjes për vendin vakant si anëtare e shtatë e Gjykatës Kushtetuese.

Nuk vonoi shumë dhe Presidenti i Republikës, Ilir Meta emëroi Sonila Bejtjen si anëtare të shtatë të Gjykatës Kushtetuese.