Soreca: Teatri u politizua! Budina: Nuk jam dakord me ju…
Ndonëse ishte një aktivitet informues për festivalin “Za Fest” që do të zhvillohet në zonat malore të Veriut të Shqipërisë ku ishte prezent Ambasadori i BE në Tiranë, Lugi Soreca, e pashmangshme ishte çështja e Teetarit Kombëtar. Ambasadori Soreca tha se janë autoritetet shqiptare ato që vendosin për shembjen apo jo të godinës ekzistuese, ndonëse e quajti çështjen delikate dhe të politizuar por regjisori Robert Budina nuk ishte dakord me këtë vlerësim dhe argumentoi këtë kundërshtim.
“Është një çështje shumë e rëndësishme dhe është pjesë e një debati intensiv që po bëhet në shoqërinë shqiptare, që përfshin shumë ndjenja dhe interesa. Çështja është delikate por edhe e politizuar. Sigurisht që nuk duhet të jemi ne ata që duhet të shprehemi nëse duhet të ketë ndërtesë të re apo të ruhet e vjetra. Këtë përgjigje e japin autoritetet shqiptare. Ashtu siç e dini, pozicioni ynë ka qënë mjaft i qartë që në shtator të vitit të shkuar. Mendoj që duhet të ketë kritere të qarta dhe transparente për projektin, qasje të drejtë dhe të ndershme. I kam ndjekur deklaratat politike, është një çështje që vazhdon të ketë debat të madh. Për ne rëndësi ka sundimi i ligjit dhe shtetit të së drejtës, procedurat e tenderit duhet të jenë në përputhje me ato të BE, me rëndësi është që procedura e tenderit është e hapur deri në datën 17 shtator. Është një çështje që duht të trajtohet me kujdes nga të gjitha palët, edhe nga institucionet ligjzbatuese,” tha ndër të tjera Ambasadori Soreca.
Por për regjisorin Robert Budina situata nuk është politizuar:
“Nuk jam dakord me ju. Nuk është e politizuar situata.
E dyta, qeveria duhet të respektojë artistët, të presë.
E treta, të mos i sulmojë brenda Teatrit Kombëtar.
E katërta, me ju kemi kërkuar një takim dhe duhet të takohemi sepse situata është shumë kritike.
E pesta, minimumi që mund të bëjë qeveria, përpara se të fillojë tenderin, i cili është i paligjshëm, duhet të presë vendimin e Gjykatës Kushtetuese, sepse kemi gjysmën e popullit që nuk është i përfaqësuar.
E gjashta, ne kemi filluar aktivitetin në Teatrin Kombëtar, po bëjmë rikonjicionin, informacionet e qeverisë nuk janë të sakta. Teatri nuk rrezikon dhe ne kemi hapur festivalin për mbrojtjen e Teatrit ku do të vijnë artistë nga e gjithë bota, përfshirë edhe z.Placido që na mbështet.
Nuk doja që të hapja asnjë polemikë, doja thjesht të komunikoja.
Ne do t’i zgjidhim me maturi, ashtu si 1 vit e gjysëm ne kemi bërë vetëm protestë paqësore dhe jemi investuar tre orë në ditë për të fituar demokracinë në Shqipëri, të cilën do ta realizojmë.”
Ndryshe festivali “Za Fest” që do të zhvillohet në zonat malore të Veriut të Shqipërisë pritet të bëjë bashkë njerëz të artit, kulturës e banorë të zonës që do të flasin për vlerat dhe kulturën shqiptare.
