Sot besimtarët myslimanë festojnë Fitër Bajramin/ Ja si u zhvillua falja…

Besimtarët myslimanë festojnë sot Fiter Bajramin, festën që mbyll Muajin e Shenjtë të Ramazanit.

Shenjimi i kësaj dite ka filluar me faljen në Bulevardin “Dëshmorët e Kombit” në orën 6:00.

Drejtues të KMSH kanë dhënë njeri pas tjetrit, mesazhet e paqes dhe solidaritetit dhe kanë evidentuar vlerat e mëdha të besimtarit dhe këtij komuniteti në tërësi.

Ceremonia e faljes u zhvillua sot në bulvardin “Dëshmorët e Kombit”.

Dje, Kryetari i KMSH po ashtu u përcoll një urim besimtarëve myslimanëve.

Me emrin e Allahut, Mëshiruesit, Mëshirëbërësit!

Të nderuar vëllezër!

Të gjithë së bashku përjetuam atmosferën shpirtërore të muajit të begatë të Ramazanit. Allahu i lartësuar na pastë pranuar agjërimin, adhurimet dhe lutjet që kemi bërë gjatë këtij muaji të madhnueshëm. Vetëm Atij i takojnë falënderimet dhe lavdet, që na mundësoi të përjetojmë gëzimin e festës së Bajramit.

Ta gëzojmë të gjithë së bashku festën e Fitër Bajramit.

Krijuesi i gjithësisë me rastin e Fitër Bajramit na sjelltë paqe, begati, mirësi dhe shëndet në familjet tona dhe në mbarë shoqërinë shqiptare.

Bajrami është kohë e takimeve vëllazërore, është momenti i shprehjes së dashurisë dhe respektit për familjet tona, për fqinjët tanë dhe për të gjithë njerëzit që na rrethojnë.

Fitër Bajrami është momenti kur ne falënderojmë Krijuesin e gjithësisë për begatitë dhe mirësitë që na ka dhënë. Bajrami është koha kur ne i japim kuptim të sotmes dhe ndërtojmë shpresën per të ardhmen e ndritur. Bajrami është festë për zemrën, festë per shpirtin, festë për të gjithë myslimanët anembanë botës.

Të nderuar vëllezër e motra!

Ka shumë veçori që e karakterizojnë një mysliman, si: ndershmëria, bujaria, zemërgjerësia, largpamësia, por unë dua të theksoj më shumë sinqeritetin si një vlerë që duhet të jetë në epiqendrën e jetës së çdo myslimani.

Ne jemi e pjesë e umetit të nderuar të profetit Muhamed a.s., shembullit më të lartë të moralit mes njerëzve. Si të tillë, jemi të obliguar që të përjetësojmë vlerat më të larta të moralit në çdo aspekt të jetës sonë të përditshme.

Sinqeriteti në veprat tona na afron drejt devotshmërisë dhe na largon nga hipokrizia. Sinqeriteti në dhënien e zekatit, të sadakasë dhe në gjitha veprat tona të bamirësisë, na afron drejt fitimit të kënaqësisë së Zotit dhe na largon nga egoizmi dhe mendjemadhësia.

Krijuesi i gjithësisë vlerëson modestinë dhe jo arrogancën, Ai vlerëson bujarinë dhe jo koprracinë, Ai vlerëson të gjithë veprat tona, që në themel kanë sinqeritetin.

Myslimani nuk rend pas dëshirës për t’u duartrokitur, duke i lidhur me veten të gjitha sukseset e arritura. Ai lumturinë nuk e kërkon te fama, pasuria, pushteti apo te gjërat e tjera të përkohshme, por te besimi në Zot dhe te përpjekjet për të fituar kënaqësinë e Tij.

Profeti Muhamed a.s. e krahason myslimanin me një pemë që jep vazhdimisht fryte dhe qëndron gjithmonë e gjelbër. Natyrisht që rrënjët e kësaj peme ushqehen nga besimi në Zot dhe frytet e saj janë veprat e mira të realizuara me nijet të pastër dhe sinqeritet.

Zoti na bëftë prej njerëzve të sinqertë, prej atyre që synim kryesor kanë fitimin e kënaqësisë së Tij.

Gëzuar edhe njëherë e për shumë vjet Fitër Bajramin.

Paqja, siguria, begatia e Zotit qofshin mbi të gjithë ju, mbi familjet tuaja dhe mbi të gjithë shqiptarët kudo që ndodhen.

Allahu e bekoftë vendin tonë dhe popullin tonë!

Tërnava: Festat, shkas për angazhim në interes të Kosovës

Pas 30 ditë të agjërimit, besimtarët myslimanë sot festojnë Fitër Bajramin. Si në gjithë botën, edhe në Kosovë ceremonia e festimit të kësaj feste myslimane nisi me faljen e namazit të mëngjesit.

Manifestimi kryesor është mbajtur në Xhaminë e Madhe në Prishtinë, ku është mbajtur ligjërata tematike kushtuar kësaj feste, ndërsa, pas saj, namazi i Bajramit, të cilit i priu sekretari i përgjithshëm i BIK-ut, Resul Rexhepi.

Kurse, myftiu i Kosovës, Naim Tërnava, duke iu drejtuar opinionit të gjerë me mesazh për këtë festë, tha se festa është për të na kujtuar rolin tonë karshi njëri-tjetrin dhe për dëftuar rrugën drejt përsosmërisë humane.

.

Falemi nga kultura e Ramazanit

“Ne falemi jo nga pamundësia por nga kultura e Ramazanit, ne i mbajmë lidhjet me të tjerët jo për ndonjë interes material por për nga kultura e Ramazanit“, tha Tërnava.

Tërnava tha se sot kujtohen prijësit shquar të Lidhjes së Prizrenit, të cilët në rrethana të jashtëzakonshme, arritën të organizojnë mbajtjen e kuvendit të Lidhjes, për t’iu bërë me dije se shqiptarët nuk do të pranojnë marrëveshje të kujtdo qofshin ato që qojnë në copëtimin e trojeve shqiptare.

Lidhja, themel mbi të cilën është ngritur kombi.

“Kuvendi i Lidhjes Shqiptare të Prizrenit  është themel mbi të cilën është ngritur kombi, mbi të cilën janë ngritur shtetet tona, mbi të cilin është ngritur motivi për pavarësi, sovranitet dhe dinjitet. Mbajtja e saj në xhami, organizimi i saj nga prijës fetar flasin për lidhjen në mes fes dhe vatanit, vërtetojnë kontributin historik të hoxhallarëve në ruajtjen e kombit“, tha ai.

Ai i bëri thirrje qytetarëve dhe përfaqësuesve të institucioneve që të marrin shkas festat tona fetare dhe kombëtare për t’u angazhuar për interesin shoqëror të vendit.

Merrin shkas festat për t’u angazhuar për interes të vendit

“Duke lutur Zotin që ta bëjë këtë festë gëzim për ju dhe familjet e juaja, ju thërras të gjithëve, popull dhe institucione, që të marrin shkas festat tona fetare dhe kombëtare për t’u angazhuar për interesin shoqëror të vendit, për të mirën e përbashkët, duke shfrytëzuar momente sikur këto, bashkimi drejt qëllimeve fisnike bëhet më i lehtë dhe më i fort. Kështu mund të marshojmë drejt qëllimeve tona shoqërore dhe shtetërore. Zotin na e pastë pranuar agjërimin dhe adhurimet tona, edhe një herë urime festa e Fitër Bajramit“, tha Tërnava.

Në këtë manifestim u dha mesazhi që të gjithë besimtarët të jenë të mirë e të mëshirshëm edhe në muajt tjerë siç ishin në muajin e ramazanit, duke u distancuar nga rrugët e liga.