Sot diskutohet Raporti i BE-së, PE kërkon heqjen e masave ndaj Kosovës

Në Draftin e Raportit të Parlamentit Evropian, PE, për Kosovën që diskutohet sot  në Komitetin për Politikë të Jashtme kërkohet heqja e masave të Bashkimit Evropian, BE, të vendosura në qershor të viti 2023.

“Ftojmë për heqjen e menjëhershme të masave të BE-së ndaj Kosovës, të cilat nuk janë më të arsyeshme dhe janë në kontradiktë me përkushtimin e dëshmuar të Kosovës ndaj vlerave evropiane dhe përshtatjen me politikat e BE-së,” thuhet në Draft ku vlerësohet përkushtimi i Kosovës për integrim në BE ndërsa nënvizohet se e ardhmja e Kosovës është në BE dhe përpjekjet për ta nxjerrë Kosovën nga një zonë gri është në interes edhe të Kosovës edhe të BE-së.

Në këtë Raport mbështetet aplikimi i Kosovës për anëtarësim në Bashkimit Evropian dhe ftohen vendet anëtare të cilat nuk e kanë njohur Kosovën që ta bëjnë këtë pa vonesa të reja. Gjithashtu kërkesën e Kosovës për anëtarësim në Këshillin e Evropës dhe planin për tiu bashkuar programit të Partneritetit për paqe të NATO-s.

Në Draft shprehet mbështetje edhe për procesin e dialogut për normalizimin e raporteve me Serbinë dhe përshëndetje dhe emërimi i Peter Sorensenit në postin e të dërguarit të posaçëm për dialog.

Sa i përket sundimit të ligjit nënvizohet përparimi domethënës në fushën e drejtësisë, sigurisë dhe lirive, luftës kundër krimit të organizuar dhe funksionimit të ekonomisë së tregut. Mirëpo shprehet shqetësim për gjendjen, siç thuhet jo të kënaqshme sa i përket korrupsionit.

Shqetësim serioz shprehet edhe për dobësitë sistematike të sistemit të drejtësisë në Kosovë, sidomos sa i përket pavarësisë dhe respektimit të ndarjeve të pushteteve. Në këtë rrafsh shprehet shqetësim i veçantë për shkak të kritikave që bëhen nga ana e zyrtarëve të qeverisë ndaj vendimeve në rastet individuale.

Në raport nënvizohet edhe shqetësimi për shkak të situatës së sigurisë. Dënohen sulmet në Bansjkë dhe Ibër Lepenc dhe kërkohet që autorët e të gjitha këtyre veprave të dhunshme të nxirren para drejtësisë. Në veçanti shprehet keqardhje pse Serbia nuk ka nxjerr para drejtësisë autorët e sulmeve në Basnjëk, përfshirë Milan Radoiçiçin.

Autor i Draftit është Riho Terras, raportues për Kosovën në Parlamentin Evropian.

Pas amendimit të Draftit, Raporti duhet të miratohet në këtë Komitet ndërsa në fillim të verës do votohet në seancë planerë kur merr versionin e Rezolutës së Parlamentit Evropian.