Sot, Dita e Rinisë, PD kremton në Qytetin Studenti
Sot në ora 11:00, me pjesëmarrjen e Kryetarit të Partisë Demokratike, në Qytetin Studenti do të kremtohet Dita e Rinisë duke përkujtuar figurën e liderit të Dhjetorit, Azem Hajdari, si dhe studentët, pedagogët, punëtorët dhe të rinjtë që u vunë në krye të Lëvizjes për Ndryshim, Shpresë dhe Liri.
“8 Dhjetori-Dita e Rinisë është data e bekuar kur rinia studentore shqiptare nisi atë që u fut në histori si “Lëvizja e Dhjetorit”, që rrëzoi komunizmin dhe solli demokracinë. Nderime përjetë atyre të rinjve guximtarë,” tha Sali Berisha në 35 vjetorin e kësaj feste!
Sot është 8 dhjetori, Dita Kombëtare e Rinisë në Shqipëri, ku 32 vjet më parë protestat studentore nisën dhe përmbysën regjimin komunist.
Në nder të studentëve të dhjetorit 1990, kjo datë përkujtohet si festë kombëtare për ditën kur një grup studentësh e pedagogësh të Universiteteve të Tiranës, inicuan dhe u bënë protagonistë të kthesës së madhe historike: rënien e komunizmit dhe lindjen e demokracisë me sistemin pluralist.
“E duam Shqipërinë si gjithë Europa” ishte kërkesa madhore e kësaj proteste që pretendonte garantimin e pluralizmit politik si bazë për një shoqëri të lirë e demokratike, shtetin e së drejtës dhe integrimin në Europë.
Akti i tyre i dha fund në mënyrë paqësore epokës të gjatë të vetëizolimit dhe të sundimit ideologjik, duke i hapur kështu rrugën e ekonomisë së tregut dhe shoqërisë së hapur.
Për të kujtuar këtë lëvizje të studentëve të dhjetorit të vitit 1990 që rrëzoi regjimin komunist, më 8 Dhjetor të vitit 2009, Parlamenti i Shqipërisë e shpalli Ditë Kombëtare të Rinisë.
