Sot Ditë Zie në Kosovë

Presidentja e Kosovës, Vjosa Osmani, ka shpallur të hënën e 25 shtatorit 2023, ditë zie shtetërore, në nderim të policit Afrim Bunjaku, i vrarë nga terroistët serb në veri.

“Zija shtetërore do të jetë gjatë ditës së hënë, ndërkaq Protokolli i Shtetit ngarkohet që t`i ndërmarrë të gjitha veprimet e nevojshme për zbatimin e këtij vendimi,” thekson Zyra e Presidentes së Kosovës përmes një njoftimi.

Njoftim

Presidentja Vjosa Osmani e shpallë të hënën ditë zie shtetërore në nderim të policit të vrarë, Afrim Bunjaku

Presidentja e Republikës së Kosovës, Vjosa Osmani, në mbështetje të Kushtetutës së Kosovës, ka marrë vendim që dita e hënë, 25 shtator 2023, të shpallet ditë zie, shtetërore në nderim të policit Afrim Bunjaku, i vrarë në veri të vendit.

Zija shtetërore do të jetë gjatë ditës së hënë, ndërkaq Protokolli i Shtetit ngarkohet që t`i ndërmarrë të gjitha veprimet e nevojshme për zbatimin e këtij vendimi.

Ndryshe, pjesëtari i Policisë së Kosovës, Afrim Bunjaku, ra në krye të detyrës dhe në mbrojtje të sovranitetit e integritetit territorial të Kosovës, në veri të vendit ku u godit nga terroristët serbë.

Rreshteri i policisë, Afrim Bunjaku, nga fshati Samadrexhë i komunës së Vushtrrisë, vdiq mëngjesin e së dielës kur grupe terroriste serbe sulmuan njësitë policore, ku për pasojë mbetën edhe të plagosur të tjerë.

Ministri i Brendshëm i Kosovës, Xhelal Sveçla, tha dje se tre sulmues janë vrarë, ndërsa gjashtë persona, që dyshohet se ishin në kontakt me ta, janë arrestuar.

Prokuroria Speciale e Kosovës ka njoftuar mbrëmë se janë dërguar në mbajtje për 48 orë gjashtë persona të përfshirë në sulmin ndaj Policisë së Kosovës, ku u vra polici Afrim Bunjaku.