Sot, seancë në dy Parlamente Shqiptare, asnjëra nuk i shërben kombit!
Sot Parlamenti i Shqipërisë dhe Parlamenti i Kosovës zhvillojnë seanca plenare pas zgjedhjeve të reja parlamentare, por, për fat të keq, asnjëra prej tyre nuk paralajmëron punë në shërbim të kombit shqiptar!
Në Prishtinë, deputetët e zgjedhur më 9 shkurt 2025 do të mblidhen sërish sot në ora 11:00 në Parlamentin e Kosovës në përpjekjen e 23-të për konstituimin e Legjislaturës së nëntë.
Ndonëse partia fituese, Lëvizja Vetëvendosje, ende nuk e ka marrë mandatin për formimin e Qeverisë pasi procesi i konstituimit ka ngecur në krijimin e Kryetarit të Parlamentit, opozita shqiptare, PDK, LDK, AAK-Nisma, dhe partia në pushtet LVV, vazhdojnë të akuzojnë njëra tjetrën për ngërçin e krijuar, për të cilin së fundi edhe Bashkimi Evropian bëri thirrje të zgjidhet.
Një orë pas këtij cirku, në seancën plenare të Parlamentit të Shqipërisë që zhvillohet me deputetët e vjetër ndonëse zgjedhjet e 11 majit nxorën deputetët e rinjë që do vazhdojnë të mbyllin sytë para bëmave të qeverisjes së vjetër të Edi Ramës, nuk pritet ndonjë risi përveç se mburrjes nga Partia Socialiste dhe akuzave nga Partia Demokratike.
Në mesazhin që kreu i Grupit Parlamentar të Partisë Socialiste, Niko Peleshi, u ka dërguar deputetëve socialistë në prag të seancës plenare, kërkohet pjesëmarrje e domosdoshme dhe thuhet se në grup do të diskutohet mbarëvajtja e veprimtarisë parlamentare në komisione dhe seancat në vazhdim.
“Përshëndetje, kolege! Siç jeni vënë në dijeni, nesër, e enjte, datë 29 maj, ora 12:00 zhvillohet seanca plenare e radhës. Paraprakisht, në 11:30 do të zhvillojmë mbledhjen e Grupit Parlamentar, po aty, në Sallën e Seancave Plenare. Diskutojmë mbarëvajtjen e veprimtarisë parlamentare në komisione dhe seanca përgjatë javëve në vazhdim. Pjesëmarrja është e domosdoshme. Faleminderit,” thuhet në mesazhin që kreu i Grupit Parlamentar të PS, Niko Peleshi, u dërgon deputetëve.
Ndërsa Kryetari i Grupit Parlamentar të Partisë Demokratike, Gazment Bardhi, në mesazhin drejtuar deputetëve demokratë për seancën plenare të ditës së sotme thekson rëndësinë e pjesëmarrjes dhe deklaron se do të bëhet gjithçka për të paraqitur faktet e asaj që ai e cilëson si farsë elektorale.
“Të nderuar kolegë, nesër ora 12:00 është seanca plenare e Kuvendit, në të cilën do të marrim pjesë dhe do të bëjmë gjithçka për të paraqitur faktet e plota për farsën elektorale të 11 majit. Ju përshëndes!” shprehet kreu i Grupit Parlamentar të PD, Gazment Bardhi.
