Sot festohet Fitër Bajrami

Besimtarët myslimanë sot festojnë Fitër Bajramin, festën që mbyll Muajin e Shenjtë të Ramazanit.

Falja e Fitër Bajrami në Tiranë u bë në sheshin “Skënderbej” në orën 6:00.

Në lutjen e tij, Kryetari i Komunitetit Mysliman të Shqipërisë, H. Bujar Spahiu, u shpreh që Zoti në këtë festë ta begatojë dhe ta mbushë me mirësi dhe paqe vendin tonë.

“Gjatë këtyre ditëve të mos mungojë vëmendja jonë ndaj fëmijëve, prindërve, të moshuarve, të sëmurëve dhe shtresës në nevojë. Le të heshtim në vend të fjalës së keqe, e kur të flasim, të flasim bukur”, u shpreh Spahiu.

Në këtë atmosferë të ngrohtë besimi e vëllazërie, pjesëmarrësit u përshëndetën dhe ndanë me njëri-tjetrin urimet e kësaj dite të madhe paqeje, mirësie e shpërblimi.

Manifestimi qendror për festën e Fitër Bajramit në Kosovë është mbajtur në Xhaminë e Madhe “Sulltan Mehmet Fatih” në Prishtinë.

Myftiu i Kosovës Naim Tërnava u ka bërë thirrje të gjithëve që të mos braktisin Kosovën, të mos migrojnë, ndërkohë bënë thirrje për unitet, edhe politik, që të krijohen vende punë dhe siguri e mirëqenie për të gjithë.

Në Hytben e Fitër Bajramit, Tërnava tha se të gjithë krenohen me vendin e tyre, se atdheu meriton sakrificën dhe se ai që i bënë keq vatanit nuk e di çka është vdekja.

Sipas tij, gjendja e rëndë ekonomike duhet të luftohet dhe duhet që të gjithë të angazhohen për të mirën e vendit, që është edhe amaneti i atyre që janë dëshmorë.

“Të mos e lëmë, të mos largohemi, të mos migrojmë, por të punojmë për ditë më të mira të atdheut tonë.  Fjalët e mia do të doja të dëgjohen si thirrje për të gjithë ne, për popull e Qeveri, të reflektojmë në të mirën dhe për të mirën e atdheut, tu krijohen mundësi të reja për punësim rinisë tonë, në mënyrë që ata të mos e marrin botën në sy, që tek ne të rinjtë tanë të mos fitohet përshtypja se ky vend është i pa perspektivë e fatin e tyre për jetë më të mirë të mendojnë se mund ta gjejnë vetëm duke u larguar nga Kosova por edhe trojet tona tjera shqiptare,” tha ai

Manifestimi qendror për Fitër Bajramin në Maqedoninë e Veriut u mbajt në Xhaminë “Mustafë Pasha” në Shkup, ku në programin e organizuar nga ana e Bashkësisë Fetare Islame të Maqedonisë së Veriut, para namazit u kënduan ilahi në gjuhën shqipe, turke dhe boshnjake.

Kreu i Bashkësisë Fetare Islame të Maqedonisë së Veriut, Sulejman Rexhepi, në mesazhin e tij para besimtarëve porositi që të solidarizohen me ata që kanë nevoj.

“E lus Allahun Fuqiplotë, për hatër të Fitër Bajramit, që të gjithë muslimanët sot me kënaqësi e festojnë në botë, Allahu të na ndihmojë, të na përkrah dhe e gjithë mëshira dhe ndihma e tij të jetë me ne”, tha Rexhepi.

Urimi i Kryetarit të KMSH-së, H. Bujar Spahiu

Me emrin e Allahut, Mëshiruesit, Mëshirëbërësit!

Të nderuar vëllezër dhe motra, të nderuar besimtarë, sot ndahemi nga Ramazani, muaji më i dashur dhe miku më i mirë, muaji i agjërimit, lutjeve, i shpalljes së Kuranit, në të cilin nuk u kursye ndihma dhe mëshira hyjnore.

Nesër është Bajram dhe me këtë rast i uroj të gjithë besimtarët myslimanë shqiptarë kudo që ndodhen, gëzuar Fitër Bajramin. Paqe, lumturi dhe harmoni sjelltë në familjet tuaja!

Zoti i madhëruar thotë: “Për Mua agjëruat në muajin e Ramazanit dhe sipas urdhërit tim falët namazin e bajramit. Kthehuni tani në shtëpitë tuaja të pastruar nga gjynahet e të falur”. Allahu ua pranoftë agjërimin, adhurimet dhe lutjet që kemi bërë gjatë këtij muaji të bekuar.

Fitër Bajrami është ditë shprese, ditë gëzimi dhe solidarizimi. Bajrami është ftesa nga zemra në zemër, për të folur më shumë me njëri-tjetrin, për t’u dashur, për të sheshuar keqkutimet, mosmarrveshjet, mëritë dhe zënkat, për të falur e toleruar.

Të nderuar besimtarë, ta gëzojme këtë festë me familjen, farefisin, fqinjët dhe gjithë shoqërinë dhe me shpresën te Zoti që ky muaj të na ketë bërë më të mirë, më afër krijuesit e njerëzve.

Gjatë këtyre ditëve të mos mungojë vëmendja jonë ndaj fëmijëve, prindërve, të moshuarve, të sëmurëve dhe shtresës në nevojë.

Le të heshtim në vend të fjalës së keqe, e kur të flasim, të flasim bukur!

Le të shërbejnë këto ditë feste për më shumë mirësi, vëllazëri, miqësi dhe dashuri, në të mirë të shoqërisë, kombit dhe gjithë njerëzimit.

Zoti ju dhëntë mirësi e begati dhe ua pranoftë agjërimin e adhurimet që keni kryer gjatë muajit të bekuar të Ramazanit!

Edhe një herë gëzuar Fitër Bajramin,

Zoti qoftë i kënaqur me ju!