Sot festohet Fitër Bajrami

Besimtarët myslimanë sot festojnë Fitër Bajramin, festën që mbyll muajin e shenjtë të Ramazanit.

Por sot ashtu si muaji i shenjtë i Ramazanit edhe falja e Fitër Bjarami ishte ndryshe. Me Vendim të Komunitetit Mysliman të Shqipërisë të datës 18 Maj, për shkak të pandemisë u vendos që falja të mos bëhet në Sheshin Skenderbej dhe sheshet e tjera të qyteteve shqiptare por vetëm nëpër xhami.

Në mesazhin e tij, Kryetari i Komunitetit Mysliman, H.Bujar Spahiu, duke kujtuar se ky muaj u përjetua ndryshe nga Ramazanet e tjera duke u privuar nga namazet e përbashkëta, iftaret dhe festimet me të dashurit, falë Zotit, thekson se ky Bajram vjen në një situatë më të përmirësuar, dhe me këtë rast falënderoi në mënyrë të veçantë të gjithë punonjësit e shëndetësisë, që punuan me përkushtim për të mbrojtur jetën dhe shëndetin e qytetarëve të prekur nga pandemia. Në një hadith kudsi Allahu u drejtohet besimtarëve:

“Për Mua agjëruat në muajin e Ramazanit dhe sipas urdhërit tim falët namazin e bajramit. Kthehuni tani në shtëpitë tuaja të pastruar nga gjynahet e të falur”.Allahu ua pranoftë agjërimin, adhurimet dhe lutjet që kemi bërë gjatë këtij muaji të bekuar.

Sot është koha që edhe njëherë të reflektojmë fort mbi vlerat e vërteta të familjes, ta mbrojmë atë nga çdo antivlerë që i kanoset asaj dhe të jemi shembull i familjes me virtytet e saj të patjetërsueshme sepse familja është e ardhmja e një kombi, ajo është qeliza e shoqërisë, shprehet Kryetari i Komunitetit Mysliman, H.Bujar Spahiu, në mesazhin e tij duke shtuar se Bajrami është festa e kënaqësisë së besimtarit e cila lind nga shpresa e përmbushjes së adhurimit dhe përfitimit të faljes ndërsa përfundon:

“Zoti ju dhëntë mirësi e begati dhe ua pranoftë agjërimin e adhurimet që keni kryer gjatë muajit të bekuar të Ramazanit! Ti lutemi Allahut që kjo festë të jetë një sihariq për të larguar sëmundjet dhe fatkeqësitë. Gëzuar Fitër Bajramin! H. Bujar SpahiuKryetar i KMSH-së!

Falet Fitër Bajrami në Kosovë, Tërnava: E dhimbshme ky namaz pa xhemat!

Ceremonia e faljes së Namazit të Fitër Bajramit është mbajtur në Xhaminë e madhe në Prishtinë. Në prezencë të një rrethi të ngushtë të zyrtarëve të Bashkësisë Islame të Kosovës, Myftiu Naim Tërnava ka uruar besimtarët myslimanë për festën e Fitër Bajramit.

Si asnjëherë më parë për faljen e Namazit të Bajramit xhamitë kanë qenë zbrazura nga njerëzit, si pasojë e pandemisë COVID-19.

Me këtë rast, Myftiu i Kosovës, Naim Tërnava ka thënë se falja e këtij namazi të Bajramit është ndryshe sepse sipas tij është hera e parë që falet pa praninë e xhematit.

“Sot jam para jush me ndjenja të përziera si asnjëherë më parë ngase është hera e parë që po ju drejtohem pa xhemat. Megjithatë sot besimtarët myslimanë kanë arsye të ndihen të gëzuar sepse festojnë njërën prej festave më të rëndësishme në Islam. Agjërimi gjatë muajit të shenjtë të Ramazanit është themeltarë në besimin Islam. Përmes këtij ibadeti që në vete përmban sakrificën – manifestohet besimi”.

“Pas kryerjes së këtij ibadeti, besimtari ka arsye që të ndjehet i lumtur dhe i gëzuar. Ka arsye që të festojë me familjarët sepse ka kryer një urdhër të Allahut”.

Ai ka theksuar se agjërimi i sivjetmë ka qenë i ndryshëm për dallim nga vitet tjera.

“Qe një kohë par shkak të pandemisë [Covid-19] jemi detyruar që të jemi të izoluar në shtëpitë tona. Të gjitha këto vendime jo të lehta janë marrë në të mirë të shëndetit publik sepse këtë e kemi edhe obligim në fenë tonë. Është urdhër nga Zoti i cili na drejtohet duke thënë ‘Assesi mos u futni jetën tuaj në rrezik’. Unë e kuptoj ndjesinë e besimtarëve që sot nuk janë në xhami për ta falur Bajramin. Ky realitet paraqet një ndjesi jo të këndshme, por është domosdoshmëri për shëndetin publik,” tha myftiu i Kosovës, Naim Tërnava i cili për shkak të pandemisë ka anuluar edhe pritjen tradicionale të Fitër Bajramit.

Fitër Bajrami në Maqedoninë e Veriut, Kryetari i BFI shpall të vdekur virusin

Besimtarët myslimanë festojnë sot Fitër Bajramin edhe në Maqedoninë e Veriut ndryshe nga vitet e kaluara, ku për shkak të pandemisë vazhdon ndalesa për lëvizjen e lirë. Nëpër xhami u fal namazi i Bajramit vetëm 15 minuta. Edhepse nuk pati manifestim qendror, kreu i BFI, Sulejman Rexhepi u paraqit në xhaminë Mustafa Pasha, madje për ta shpallur të vdekur koronavirusin.

“Dhashtë Zoti që në kushte edhe më të mira më të volitshme dhe me fitoren tonë mbi të keqen. E keqja ndërkombëtare që tronditi tërë globin, mbarë njerëzinë në botë ishte Koronavirusi, pandemia COVID 19 të cilën unë besoj se e kemi mundur. Unë kam bindje se e kemi fituar dhe prej këtij momenti mund ta shpalli të vdekur një herë e përgjithmonë,” tha kreu i BFI, Sulejman Rexhepi në xhaminë Mustafa Pasha ku besimtarët respektuan masat brenda dhe në oborr.

Edhe në Xhaminë e Bedrit në Butel namazi i Bajramit u fal sipas rregullave, 15 minuta ndonëse besimtarët nuk u kujdesën aq shumë për distancën dhe maskat situatë kjo e ngjashme në Tetovë dhe Gostivar ku protokollet u respektuan në xhami por jo edhe në oborret e tyre.

“Kemi pasur mundësi që ata të cilët nuk patën maska kanë pasur mundësi të marrin këtu në xhami dhe që ti plotësojmë të gjithë këtu tek ne është traditë të shkojnë të vizitojnë varrezat por ne u apeluam që mos të shkojnë për këtë vit, gjithashtu për vizitat familjare duhet të kenë kujdes dhe ti respektojnë rregullat, ne gjithë duhet ti respektojmë rregullat të kemi distancë që të mbrohemi. Duhet të mbrohemi tu përmbahemi udhëzimeve dhe rregullave të ekspertëve dhe institucioneve që ta ruajmë dhe mbrojmë vet veten, familjen dhe të tjerët,” tha Imami i Xhamisë së Larme në Tetovë, Abylbaki Kasami, aty ku çdo besimtar në hyrje të xhamisë u dezinfektua, këshilli i xhamisë i pajisi me maska ata që nuk kishindhe falja zgjati vetëm 15 minuta.

Mesazhi

Bismilahi Rrahmani Rrahim

Falënderimet i takojnë Allahut, Krijuesit të botëve.

Paqja dhe bekimi i Zotit qoftë mbi profetin Muhamed (a.s), familjen, shokët dhe mbi të gjithë ata që pasojnë rrugën e tij.

Të nderuar besimtarë, vëllezër dhe motra, sot ndahemi nga një mik shumë i vyer dhe i shtrenjtë, ndahemi nga muaji i Bekuar i Ramazanit, muaji i Kuranit, lutjeve, mirësive, bujarisë dhe dashurisë hyjnore.

Muaji që lamë pas na ka rizgjuar ndjenja dhe virtyte të larta duke na ndriçuar ndërgjegjen dhe lartësuar shpirtin.

Nesër është Fitër Bajrami dhe me këtë rast i uroj të gjithë besimtarët myslimanë shqiptarë kudo që ndodhen, gëzuar e për shumë vjet. Paqe, lumturi dhe harmoni sjelltë bajrami në familjet tuaja!

Fitër Bajrami është kurorëzimi i muajit të Ramazanit, është ftesa e shpalosjes së vlerave të fituara në këtë muaj, është shpërblimi i sakrificës, është afrimi më shumë me Zotin. Bajrami është ditë shprese, gëzimi dhe solidarizimi, është dita e manifestimit të vlerave dhe virtyteve që Ramazani i ka rizgjuar tek njeriu, është dita e falënderimeve dhe dita e dashurisë.

Këtë muaj e përjetuam ndryshe nga Ramazanet e tjera, u privuam nga namazet e përbashkëta, iftaret dhe festimet me të dashurit. Por falë Zotit ky Bajram vjen në një situatë më të përmirësuar.

Me këtë rast dua të falënderoj në mënyrë të veçantë të gjithë punonjësit e shëndetësisë, që punuan me përkushtim për të mbrojtur jetën dhe shëndetin e qytetarëve të prekur nga pandemia.

Në një hadith kudsi Allahu u drejtohet besimtarëve: “Për Mua agjëruat në muajin e Ramazanit dhe sipas urdhërit tim falët namazin e bajramit. Kthehuni tani në shtëpitë tuaja të pastruar nga gjynahet e të falur”.

Allahu ua pranoftë agjërimin, adhurimet dhe lutjet që kemi bërë gjatë këtij muaji të bekuar.

Të nderuar besimtarë, bajrami është festa e bashkimit, kështu që ta festojmë të gjithë bashkë. Të kujdesemi për të afërmit, për njerëzit në nevojë, të qëndrojmë pranë tyre dhe të përpiqemi që kjo festë të festohet nga të gjithë, çdo shpirt ta përjetojë gëzimin dhe madhështinë e kësaj feste.

Gjatë këtyre ditëve të mos mungojë vëmendja jonë ndaj familjes, fëmijëve, prindërve, të moshuarve, të sëmurëve dhe shtresës në nevojë.

Është koha që edhe njëherë të reflektojmë fort mbi vlerat e vërteta të familjes, ta mbrojmë atë nga çdo antivlerë që i kanoset asaj dhe të jemi shembull i familjes me virtytet e saj të patjetërsueshme. Familja është e ardhmja e një kombi, ajo është qeliza e shoqërisë. Sa më e shëndoshë të jetë familja aq më e ndritur do të jetë edhe e ardhmja kombit tonë.

Bajrami është festa e kënaqësisë së besimtarit e cila lind nga shpresa e përmbushjes së adhurimit dhe përfitimit të faljes.

Le të shërbejë kjo festë për të larguar brengat, mëritë dhe hatërmbetjet. Të mbjellim virtytet e dashurisë, mirësisë, vëllazërisë dhe miqësisë. Të flasim me gjuhën e shpirtit, të ndërtojmë ura mirëkuptimi.

Zoti ju dhëntë mirësi e begati dhe ua pranoftë agjërimin e adhurimet që keni kryer gjatë muajit të bekuar të Ramazanit!

Ti lutemi Allahut që kjo festë të jetë një sihariq për të larguar sëmundjet dhe fatkeqësitë.

Gëzuar Fitër Bajramin!

H. Bujar SpahiuKryetar i KMSH-së