Sot festohet Krishtlindja
Besimtarët e krishterë sot kremtojnë Krishtlindjen, një prej datave më të rëndësishme të kalendarit të tyre fetar. Duke drejtuar meshën e Krishtlindjes në Katedralen e Shën Palit në Tiranë, Arqipeshkvi Metropolit i Tiranë-Durrësit, Imzot George Frendo tha se festës së Krishtlindjes nuk i shuhet shkëlqimi, edhe pse jemi në kohë pandemie.
“Krishtlindjes nuk i shuhet shkëlqimi as në këto ditë. Duhet të gjithë bashkë të themi: Na shpëto o Zot Jezus. Të lutemi për ata që ndihen të vetmuar”.
Me këtë Imzot George Frendo ka treguar edhe historinë e një 78-vjeçari, të prekur me COVID i cili fliste me shumë dashuri për familjen.
“Krishtlindja është festa e familjes”. “Isha në dhomë bashkë me një burrë 78-vjec, jemi bërë shumë miq. Fliste për gruan që ai e donte pa masë, më tregoi fotografinë e saj, ende ishte shumë e bukur, por e paralizuar. Ai kujdesej duke e larë dhe duke gatuar, është një shembull i asaj dashurie që nuk vjetërohet. Fliste për fëmijët që i kishte rritur me shumë dashuri dhe sakrificë dhe ata në shumë mënyra vazhdojë të tregojnë dashurinë dhe mirënjohje.”
Pas kësaj historie Imzot Frendo u shpreh:
“Krishtlindja është festa e familjes. Rroftë Krishti, rroftë Jezuzi dhe me këtë gëzim ju uroj gëzuar Krishtlindjen”, tha Imzot Frendo.
Mesha e Krishtlindjes për shkak të masave të reja të pandemisë filloi mbrëmjen e së enjtes në orën 18:00 në Katedralen e Shën Palit dhe 18:30 në Dioqezat e tjera, në mënyrë që qytetarët të kishin mundësi që të kthehen në shtëpi para orës së re policore e cila fillon në orën 20:30.
Ndërkohë në Prishtinë mesha e Krishtlindjes në Katedralen Shën Nënë Tereza u drejtua nga Ipeshkëvi i Dioqezës Prizren – Prishtinë, Imzot Dodë Gjergji.
Për dallim nga Tirana, në Kosovë, në nderim të festës së Krishtlindjes autoritetet shtetërore lejuan mbajtjen e meshës në orarin e zakonshëm duke filluar nga ora 23:30, duke respektuar masat Anticovid.
Ndërkohë mëngjesin e sotëm në Kishën Orthodokse “Ngjallja e Krishtit” në Tiranë u kremtua lindja e Krishtit.
Në mesazhin e Krishtlindjes drejtuar besimtarëve, Kryepeshkopi i Tiranës, Durrësit dhe Gjithë Shqipërisë, Anastas Janullatos është shprehur se kufizimet për shkak të pandemisë do të kenë edhe disa efekte anësore pozitive.
“Ky është një rast për të vlerësuar se sa shumë rëndësi kanë në jetën tonë shpirtërore dhe shoqërore ato gjëra që besimtarët i konsiderojnë të vetëkuptueshme, si mundësia për të shkuar në kishë, kur të duam ne, për t’u lutur, për të marrë pjesë në shërbesat fetare dhe në misteret e Kishës,” tha Kryepeshkopi Janullatos.
