Sot festohet Krishtlindja

Besimtarët e krishterë sot kremtojnë Krishtlindjen, një prej datave më të rëndësishme të kalendarit të tyre fetar. Duke drejtuar meshën e Krishtlindjes në Katedralen e Shën Palit në Tiranë, Arqipeshkvi Metropolit i Tiranë-Durrësit, Imzot Arjan Dodaj, tha se në këtë natë të dalim me shpresën, por edhe me zemrën,”

“Në çdo stinë njeriu pa Zot fatkeqësisht është në dimër.

Shpresa është lajtmotivi i këtij viti jubilar, është motra e vogël e tri virtyteve teologale. Shpeshherë flasim për fenë e bëjmë mirë. Flasim për dashuri e bëjmë akoma më mirë. Por si mund të kultivojmë fenë e dashurinë kur nuk kemi shpresë.

Nuk kemi më shpresë se do të ndryshojë diçka. Nuk kemi më shpresë se do të ndryshosh ti, do të ndryshoj unë. Nuk kemi më shpresë se kemi të ardhme, e atëherë ç’ia vlen të kemi shpresë edhe në Zot, ç’ia vlen të kemi dashuri midis nesh kur nuk kemi shpresë?

Kemi nevojë atëherë të edukojmë brezat e rinj te shpresa, sepse janë shumë të shpërqendruar nga gjërat e kota e nuk dinë të shohin më gjërat e bukura. Kush nuk ka shpresë nuk ka familje. Kush nuk ka shpresë nuk jeton në rrjet, nuk është online me dashurinë, fenë, me Zotin.

Ne shpeshherë e hapim edhe xhepin, por kemi harruar ku kemi zemrën. Sa bukur atëherë që këtë natë të dalim me shpresën, por edhe me zemrën,” tha Arqipeshkvi Metropolit i Tiranë-Durrësit, Imzot Arjan Dodaj duke pëfunduar:

“Jezus, bëj që drita e kësaj nate të shndrisë si ditë dhe të shpaloset në të ardhmen për brezat e rinj të popullit shqiptar, për të moshuarit që kërkojnë një mbështetje më të madhe që të kenë frytin e sakrificës, mundit dhe vuajtjes që kanë kaluar për shumë dekada, veçanërisht për ato dekada që u kanë vjedhur rininë, si ato të diktaturës, që t’i shpalosë mbarë njerëzimit udhën për hapat e jetës dhe vëllazërisë.”

Ndërkohë në Katedralen “Ngjallja e Krishtit” në Tiranë u zhvillua mesha solemne e Kishës Orthodhokse Autoqefale të Shqipërisë.

“Perëndia, tek i cili kemi mbështetur jetën tonë, nuk e braktisi njerëzimin, të cilin e mundon egoizmi dhe armiqësia. Ai vazhdon të jetë Emanueli, “Perëndia është me ne”, duke i dhënë jetës kuptim dhe përmbushje,” tha Kryepeshkopi i Tiranës, Durrësit dhe i Gjithë Shqipërisë, Anastas Janullatos, në mesazhin e tij duke shtuar se përmes përulësisë, e cila ndërthuret gjithmonë me dashurinë, i kundërvihet krenarisë, rrënjës së përhershme të çdo të keqeje, lakmisë, agresivitetit, konflikteve vrastare, përplasjeve shkatërrimtare.

“Në epokën tonë të ashpër dhe të veçantë, ku në shumë zona vërshon furishëm urrejtja dhe dhuna, ne të krishterët, që i qëndrojmë besnik atij që u shfaq në mish, Princit të paqes, le të bëjmë gjithnjë qëndresë, me tërë forcat tona shpirtërore dhe trupore, kudo dhe me aq sa mundemi.

Kisha nuk kufizohet thjesht në disa reflektime; ajo i kremton këto ngjarje në mënyrë dhoksologjike dhe i shpjegon përmes himneve. “Ja Krishti lind, lavdërojeni. Ja Krishti qiellit vjen, dilni priteni. Ja Krishti mbi dhénë, ngrihuni!”. Në këto ditë kremtuese, ne që jemi besimtarë duhet të lartësohemi drejt një jete lavdërimi dhe dashurie,” tha Kryepeshkopi i Tiranës, Durrësit dhe Gjithë Shqipërisë, Anastas Janullatos, duke rikujtuar ndërsa përfundoi:

“S’ka gjë më të bukur sesa të duash, edhe sikur të lodhesh, sado që të vuash. S’ka gjë më të mrekullueshme sesa të duash, “në Krishtin” vërtet të duash. ‘Perëndia është dashuri. Ai që qëndron në dashuri, qëndron në Perëndinë dhe Perëndia qëndron në të’.

Krishtlindje të Bekuara!

Me paqe dhe shpresë qoftë Viti i Ri 2025!”