Sot flet Amerika

Sot në Amerikë zhvillohen zgjedhjet presidenciale historike drejt së cilës e gjithë bota mbanë sytë sepse është vota amerikane ajo e cila do të vendos nëse do të vazhdoj të ketë inflacion apo mirëqenie në Shtetet e Bashkuara, luftë apo paqe në Ukrainë, tension apo qetësi në Rusi, terror apo armëpushim në Lindjen e Mesme, hakërrim apo mbyllje goje në Iran, dhe kërcënim apo rikthim të dorës së zgjatur nga Korea e Veriut!

Pra, Kamal Harris apo Donald Trump!

Për Evropën, e përkthyer kjo në vetëm një realitet, vazhdim i groposjes ekonomike në dallgën e Zelenskyyt apo kthim nga vetëvetja, me rikthim të rritjes serioze ekonomike; Si dhe ndalim të dobësimit ushtarak të Aelancës më të fuqishme në botë, NATO!

Për Ballkanin! Një Departament i Shtetit i asfiksuar që nuk po e merr veten që nga koha e Presidentit Obama apo vazhdim i rimëkëmbjes aty ku e la Administrata Trump në vitin 2020!

Për shqiptarët dy janë risitë që mund të sjellin këto zgjedhje historike në SHBA, Shqipërinë me diplomatë të korruptuar amerikanë nga Edi Rama apo pa Ishullin Sazan, dhe, Kosovën me Chris Hillin nëpër këmbë në rrugën e zgjidhjes së marrëdhënieve me Serbinë, ose me Richard Grenellin !

Flet sovrani

“Flet sovrani” është kuptimplotë vetëm në Amerikë pavarësisht betejës që sondazhet bënë me mullinjtë e erës dhe nuk e thanë dot edhe pak orë para hapjes së qendrave të votimit, që do të fitoj ajo për të cilën aq shumë u angazhuan, Kamala Harris! Dhe, togëfjalëshi i përsëritur nga këto kompani të sondazheve “gara është e ngushtë” në kampin e Donald Trump përkthehet “Kamala Harris po humb”!

Në fjalët e fundit në tubimin pas mesnatës në arenën Grand Rapids në Michigan, Donald Trump ishte i qartë si gjithmonë për rritjen e sigurisë së kufinjve dhe ekonominë që e rrënoi dyshja Biden-Harris.

Ndërsa për këtë fushatë zgjedhore në karrierën e tij, meqë nuk mendon të kandidoj sërish për president, kandidati republikan ishte i prerë:

“Kjo është e fundit,” tha Donald Trump, duke vlerësuar se ka mbajtur 930 tubime që nga momenti kur fillloi fushatën e parë në vitin 2015.

“Nëse arrijmë ti nxjerrim njerëzit tanë në qendrat e votimit, merr fund, ata nuk mund të bëjnë asgjë!”

E Kamala Harris nuk kishte se si të paraqitej ndryshe në Philadelphia përveç se një komuniste e thekur! Të qëndrosh katër vjet në Shtëpinë e Bardhë dhe të mos kesh një fjalë të rezervuar për fjalën e fundit por nga shkallët e muzeut të artit që u bënë të famshme nga filmi Rocky, dhe performancës së yjeve më të njohura botërore si Lady Gagu dhe Oprah Winfrey që i vunë zjarrin publikut të pranishëm, veten e quajti “outsider” e cila sikur Rocky është e gatshme “të ngritet deri në fitore”.

“Vrulli është në anën tonë,” tha Kamala Harris para publikut që brohoriste: “Do të fitojmë!.”

“Sonte, pra, përfundojmë ashtu siç kemi filluar: me optimizëm, me energji, me gëzim,” tha Kamala Harris duke parashikuar fundin e zgjedhjeve më të paparashikuara në historinë e SHBA.

Që janë zgjedhje të tilla, i konfirmoi dhe rezultati në fshatin amerikan Dixville Notch ku u hap procesi zgjedhor në minutat e para të së martës së 5 Nëntorit, dhe rezultoi me vota të barabarta:

Kamala Harris – Donald Trump 3:3

Ligji zgjedhor në New Hampshire i lejon komunave me më pak se 100 banorë që të hapin qendrat e votimit pas mesnatës dhe ti mbyllin kur të gjithës votuesit të ushtrojnë detyrimin e tyre qytetar, dhe është bashkësia në Dixville Notch që me dekada të tëra e fillon ditën e zgjedhjeve ndonëse qendrat e votimit në SHBA hapen në orën 05:00 (11:00 sipas kohës tonë lokale)

Në vitin 2020, të gjithë banorët e Dixville Notch votuan për Joe Biden, që nga koha kur kjo traditë e votimit të mesnatës filloi në vitin 1960.

Shumica e qendrave të votimit në ishullin lindor do hapen në orë 06:00 ose 07:00.

Sot njëkohësisht votohet edhe për përbërjen e re të Kongresit dhe një të tretën e Senatit.

Zgjedhje historike

Këto zjedhje presidenciale në SHBA konsiderohen historike për shumë arsye! 

Nëse fiton republikani Donald Trump, do të bëhet presidenti i parë që nga shekulli i XIX i cili fiton pasi ka humbur në rizgjedhje, presidenti i parë ndaj të cilit janë bërë dy atentate gjatë fushatës zgjedhore, dhe, presidenti i parë me dënim për vepër penale.

Nëse demokratja Kamala Harris del fituese, do të futet në Shtëpinë e Bardhë jo vetëm si presidentja e parë e SHBA por si presidentja e parë me ngjyrë, dhe presidentja e parë me prejardhje aziatike.

Mirëpo, ndonëse ka një garë të ngushtë mes këtyre dy kandidatëve, Harris dhe Trump, njëri prej të cilëve do të hyjë në Shtëpinë e Bardhë, duhet përmendur se për postin e Presidentit janë edhe tre kandidatë zyrtarë dhe tashmë 19 kandidatë janë tërhequr nga gara.

Jill Stein, 74 vjeçe, është një mjeke që kandidoi me Partinë e Gjelbër në 2016 dhe tani ka rihyrë në garë. Ajo akuzoi demokratët se kanë thyer edhe një herë premtimet e tyre për punëtorët, të rinjtë dhe klimën. US News raporton se Stein mori vetëm 1% të votave në 2016.

Cornel West, 71 vjeç, është një aktivist politik, akademik dhe filozof që kandidon si kandidat i pavarur, duke kërkuar të tërheqë votues më progresivë dhe demokratë.

Chase Oliver, 39 vjeç, është një kandidat pak i njohur i Partisë Libertariane. Pas dy përpjekjeve të pasuksesshme për të përfaqësuar Gjeorgjinë në Dhomën e Përfaqësuesve dhe Senatin, Oliver njoftoi në prill 2023 se po kandidonte për President të Shteteve të Bashkuara. Oliver e filloi aktivizmin e tij politik duke kundërshtuar luftën në Irak në fillim të viteve 2000. Ai u zgjodh zyrtarisht si kandidati Libertarian në konventën kombëtare të partisë më 26 maj. Mike ter Maat, një ekonomist, është kandidati për zëvendëspresident i Partisë Libertariane.

Kur do të dihet fituesi? 

Vendvotimet mbyllen në mbrëmjen e së martës, por mund edhe të mos dihet fituesi – Donald Trump ose Kamala Harris – edhe disa ditë pasi të përfundon procesi i votimit nëse gara është e ngushtë.

Sondazhet kombëtare në shtetet kyçe e kanë krijuara dhe situatën shumë të paparashikueshme në orët e fundit, kështu që pritet edhe rezultati shumë i ngusht në disa shtete federale, që mund të sjell dhe rinumërim të votave.

Gjithashtu, disa rezultate mund të jenë më të avashta për shkak të ndryshimeve në mënyrën se si disa shtete, ku përfshihen shtatë shtetet kyçe, kanë administruar zgjedhjet nga viti 2020.

Nga ana tjetër, në disa vende si Michigan është përshpejtuar numërimi i votave, dhe shumë më pak do ketë vota me postë se sa në zgjedhjet e kaluara, që janë mbajtur gjatë pandemisë. 

Në vitin 2020 zgjedhjet janë mbajtur të martën e 3 nëntorit por rrjetet televizive amerikane nuk e kanë shpallur fitues Joe Bidenin deri në orët e vona të së shtunës së 7 nëntorit.

Presidenti i ri do të inaugurohet të hënën e 20 janarit 2025 para Capitol Hill, në inaugurimin e 60-të presidencial në historinë e SHBA.