Sot kanë nevojë për mbështetje, Basha: Koha s’pret. Plani ynë ndihmon çdo shqiptar!

Duke sjellë historinë e njërit prej mijëra bizneseve me të cilat është përballur gjatë turit të tij nëpër Shqipëri, ku kriza ekonomike dhe taksat që rriten përditë i kanë çuar drejt falimentimit, Kryetari i Partisë Demokratike, Lulzim Basha, ngre alarmin për njerëzit që sot kanë nevojë për mbështetje dhe është Plani i PD që ndihmon çdo shqiptar në vështirësi.

“Koha nuk pret. Njerëzit sot kanë nevojë për mbështetje. Plani ynë ndihmon çdo shqiptar në vështirësi,” shprehet Lulzim Basha duke sjellë rastin konkret me videodëshminë e Rabjana Shimës, një prej shumë bizneseve të vogla në Tiranë që për shkak të rritjes së taksave nga viti 2013 tashmë rrezikon falimentimin:

“Jam Rabjana Shima. Unë biznesin tim e kam hapur në vitin 2007. Në 2013-ën, filluan taksat të ndryshojnë. Taksat u rritën jashtë mase shumë saqë po bëhet e papërballueshme.

Taksat lokale, taksë pastrimi unë paguaj 690 mijë në vit. Taksë arsimi paguaj 170 mijë në vit, dhe taksë e hapësirës publike 100 mijë lekë në vit. Kam kaluar, kam 4 vite që jam biznes i madh me TVSH.

Me këtë dyqan të vogël që është 25 metra katror, më kanë kaluar me xhiro mbi 95 milion në vit dhe kam paguar mbi 10 muaj tatim fitimin 170 mijë lekë në muaj. Puna është duke rënë dita-ditës.

Unë punoj burrë e grua nga mëngjesi deri në darkë.

30 ditë në muaj në jemi në punë, nuk kemi ditë pushimi, nuk kemi ditë feste. Nuk kam ditë kur unë sëmurem të rri në shtrat, nuk më paguan njeri. Ne jemi drejt falimentimit. Për pak unë do t’i vendos kyçin dhe nuk e di së ku do të shkoj.”