Sot në ora 18:00, Shqipëria sfidon për herë të parë Gjibraltarin

Shqipëria do të luajë sot ndeshjen e parë miqësore ndaj Gjibraltarit, që do të pasohet nga takimi zyrtar që zhvillohet në datën 9 shtator ndaj Letonisë.

Ky takim, mund t’i shërbejë stafit teknik për të parë gjendjen e skuadrës, por në të vërtetë, vëmendja është te ndeshja që luhet pas pak ditësh në “Air Albania”. Ditën e djeshme, kuqezinjtë kanë mbyllur stërvitjen në Malaga të Spanjës, ku trajneri i Kombëtares shqiptare, Sylvinho Mendes Campos Junior, i ka dhënë dorën e fundit përgatitjeve, duke përcaktuar edhe formacionin dhe lojtarët që do të luajnë në këtë takim.

Formacioni i mundshëm

Duke qenë se pas pak ditësh Shqipëria përballet me Letoninë, kjo ndeshje mund t’i shërbejë trajnerit për të provuar se kush është i gatshëm për të përballuar atë takim, megjithëse pritet që të marrin minuta edhe futbollistë të cilët nuk kanë pasur mundësi që të luajnë deri më tani. Porta sërish do t’i besohet Strakoshës, i cili po kalon një moment të mirë në Greqi, teksa minuta mund të ketë edhe për Mario Dajsinanin.

Në mbrojtje, Kumbulla dhe Gjimshiti do të jenë në qendër, të ndihmuar nga Balliu në të djathë e Aliji në të majtë. Në qendër të mesfushës, Berisha, Shehu e Asllani pritet të ndihmojnë treshen e sulmit që në qendër mund të ketë Dakun dhe në krahë Bajramin e Hoxhën.

Ndeshja

Për kuqezinjtë, kjo është hera e parë që luajnë me Gjibraltarin, pasi në të kaluarën nuk janë përballur asnjëherë. Ky takim, do të luhet në stadiumin “Europa Point” në Gjibraltar, duke nisur nga ora 18:00.

Agjenda

Kuqezinjtë janë grumbulluar prej disa ditësh në Spanjë ku edhe kanë zhvilluar seancat stërvitore për ndeshjen ndaj Gjibraltarit, teksa edhe udhëtimi në drejtim të stadiumit, do të bëhet pikërisht ditën e sotme para ndeshjes. Në përfundim të takimit, kuqezinjtë do të rikthehen në hotel dhe nesër skuadra pritet të mbërrijë në Tiranë, ku edhe do të nisë përgatitjet për ndeshjen ndaj Letonisë./Panorama/