Sot në orën 17:00 mbahet seanca për konstituimin e Parlamentit të Kosovës

Seanca për konstituimin e Parlamentit të Kosovës do të mbahet sot në orën 17:00. Kjo seancë pritet të drejtohet nga deputeti më i vjetër, Avni Dehari, nga Lëvizja Vetëvendosje.

Pas mbledhjes me përfaqësuesit e partive politike, kryetari në detyrë i Parlamentit të Kosovës, Dimal Basha, njoftoi se ka pasur konsensus që në seancën konstituive nënkryetarët e Parlamentit të votohen në pako.

Sipas tij, pas konstituimit të Parlamentit do të vazhdohet me seancën për votimin e Qeverisë së re të Kosovës.

Sipas njoftimit të zyrës për informim të Parlamentit, pikat e Rendit të Ditës janë:

1. Bormimi i Komisionit të përkohshëm për verifikimin e kuorumit dhe të mandateve të deputetëve,

2. Betimi i deputetëve,

3. Zgjedhja e Kryetarit të Parlamentit, dhe

4. Zgjedhja e nënkryetarëve të Parlamentit.

Ndryshimin e orarit të mbajtjes së seancës konstituive siç e ka përcaktuar Presidentja e Kosovës, Vjosa Osmani, në orën 12:00, Dimal Bala e ka sqaruar:

“Liderët e subjekteve politike kanë pranuar që mbledhja e seancës konstituive të mbahet në orën 17:00 dhe pastaj të vazhdohet me votimin e Qeverisë,” tha Dimal Basha për ndryshimin i cili erdhi pas kërkesës së Partisë Demokratike të Kosovës, pasi në Hagë do të mbahen deklaratat përmbyllëse të ekipeve mbrojtëse të ish-krerëve të Ushtrisë Çlirimtare të Kosovës.