Sot nis viti i ri shkollor 2024-2025, 28 mijë nxënës në klasën e parë

Sot nis viti i ri shkollor 2024-2025 për 350 mijë nxënës, 28 mijë prej të cilëve ulen për herë të parë në bankat e shkollës.

Ky vit i ri shkollor vjen me risi e investime të rëndësishme, thekson Ministria e Arsimit dhe Sportit, ku prej 9 shtatorit, për nxënësit me nevoja të veçanta do të ketë 2100 mësues ndihmës, 200 më shumë se në vitin 2023; 240 oficerë sigurie do të jenë të dedikuar për sigurinë e nxënësve në shkolla, 40 më shumë se më 2023; Ndërsa numri i psikologëve dhe punonjësve socialë do të shkojë në 850, 50 më shumë se në vitin e kaluar shkollor ndërkohë Ministrja e Arsimit dhe Sportit, Ogerta Manastirliu u shpreh se 238 mijë nxënës marrin libra falas vit shkollor.

Por, atë që nuk e thotë Ministria e Arsimit e thotë INSTAT. Numri i nxënësve në shkollat 9-vjeçare në këtë vit të ri shkollor është 7.8% më pak se viti i kaluar, ose 20 mijë nxënës më pak; Dhe, 125 mijë nxënës më pak se në vitin 2014.

Ndërkohë Policia e Shtetit Policia e Shtetit, në përmbushje të misionit dhe detyrave të përcaktuara në Paketën e Sigurisë në Shkolla, ka hartuar një plan të detajuar masash me detyra konkrete për të gjitha strukturat e angazhuara të saj.

Për të siguruar zhvillimin normal të procesit mësimor dhe sigurinë e nxënësve në ambientet e jashtme dhe në afërsi të shkollave, Policia e Shtetit ka angazhuar ndihmës specialistët e Policisë në zona, punonjësit e Policimit në Komunitet, shërbimet e Patrullave të Përgjithshme, Forcën e Posaçme “Shqiponja”, Policinë Rrugore dhe Policinë Kriminale. Përpara fillimit të vitit shkollor është bërë një vlerësim i situatës kriminale në të gjitha qarqet. Bazuar në këtë vlerësim, strukturat vendore të policisë kanë hartuar plane masash me detyra të qarta për kontrollin e territorit, ruajtjen e rendit dhe angazhimin e policisë kriminale dhe rrugore.