Sot ora policore fillon në orën 22:00, rinisin fluturimet me Britaninë

Sot ora policore fillon nga ora 22:00 dhe zgjatë deri në orën 06:00 të mëngjesit, orar ky që vlenë dhe për baret e restorantet. Gjithashtu sot fillojnë edhe fluturimet me Britaninë e Madhe. Duke arsyetuar këtë vendim të Komitetit Teknik të Ekspertëve, tha Ministrja e Shëndetësisë, Ogerta Manastirliu, duke bërë me dije se lehtësimet po vijnë si rezultat i situatës së qëndrueshme epidemiologjike

“Situata epidemiologjike paraqitet e qëndrueshme, me tendencë në rënie të incidencës dhe kjo është vënë re nga java e tretë e Marsit dhe në vijim. Rënie është vënë re edhe sa i takon përqindjes së pozitivitetit të rasteve të reja, ku gjatë javëve të fundit ka rënë deri në 12%. Rënia shënohet edhe në shtrimet në spitale. Prej 4 ditësh nuk ka pacientë në Spitalin COVID 4, i cili do vijojë të jetë në gatishmëri, por që pa dyshim është një tregues pozitiv i situatës në spitale. Aktualisht niveli i shfrytëzimit të shtratit është nën 30%, ndërsa terapia intensive nën 13%,” tha Manastirliu ndërsa për rinisjen e fluturimeve me Britaninë e Madhe shtoi:

“Duke marrë në konsideratë përmirësimin e ndjeshëm të situatës së epidemisë në Mbretërinë e Bashkuar, një shtet i cili ka pasur një ecuri shembullore sa i përket vaksinimit, Komiteti Teknik i Ekspertëve ka propozuar rihapjen e fluturimeve me këtë shtet,” tha Ministrja e Shëndetësisë, Ogerta Manastirliu, duke përsërit thirrjen që të mos neglizhojmë asnjë moment masat anticovid: distancimi, maskën, higjenën.

Ndryshe, ky Vendim i Komitetit Teknik të Ekspertëve do të jetë në fuqi për dy javët e ardhshme.