Sot plot 77…(7)

nga Zija Çela

Sot plot 77. Por edhe shuma e datës 25 (2 + 5) nxjerr prapë 7 tjetër… Dhe dua apo s’dua, mendimi i parë: Sa shumë, o Perëndi, kur im bir jetoi vetëm 36!

Natyrisht, askush s’e vë në dyshim se të gjithëve, pa e ditur kur pikërisht, na duhet ta mbajmë zotimin e gjenezës. Atë zotimin pa apelim që kemi ndaj vdekjes, sapo të na thërrasë. Asaj pra, asaj që ia kemi frikën, që duam t’i ikim, që e mallkojmë, që e quajmë mortja e zezë. Por, vallë, a do t’i jepnim jetës çmim kaq të çmueshëm, po të mos ekzistonte kjo “e zeza”?!… Ndoshta, prandaj, për njerëzimin ditëlindjet janë Himni më i përhapur për Jetën dhe Psalmi më i përbotshëm i Mirënjohjes për mrekullinë e Zotit mbi tokë.

Sot plot 77… (7)

Nëse, rastësisht, algoritmet ju nxjerrin në shteg dhe ndaleni te ky status, pranoni falenderimet e këtij vdekatari që, prej egos universale të njeriut, sërish dëshiron të jetojë, të jetojë gjatë, pasi ka shumë më tepër punë për të kryer, se sa ka jetë.

Portret nga Buron Kaceli, vaj.

Portret nga Saimir Strati, mozaik.