Sot premiera e shfaqjes “Burrnesha”

Qendra Multimedia sot në orën 20:00 në Teatrin Oda në Prishtinë, shfaq premierën “Burrnesha”.

Regjisori i shfaqjes Erson Zymberaj u shpreh i kënaqur me punën që është bërë, si nga ana e tij, si nga ana e aktorëve, po ashtu edhe e autorit të shfaqjes Jeton Nezirajt. Ndër të tjera Zymberi shtoi se së bashku me ekipin artistik të shfaqjes “besoj që kemi arritur të risjellim një rrëfim interesant rreth fenomenit “Burrnesha”.

“Shfaqja synon që përmes formatit e konceptit regjisorial, gjithsesi bashkë me dramën / tekstin dhe lojën e aktorëve, të shtrojë pyetje e nxisë debat rreth çështjeve gjinore.Mënyra e shkrimit të dramës që nga rrëfimi a tregimi i saj, bashkë me udhëtimin e transformimin fizik e psikologjik të ‘Burrneshës’, ka qenë impresive për mua si regjisor, dhe ka qenë pikënisje për ndërtimin e saj në një shfaqje teatrale. Mandej, bashkë me ekipin artistik të shfaqjes besoj që kemi arritur të risjellim një rrëfim interesant rreth këtij fenomeni,” tha për RTK regjisori i shfaqjes, Erson Zymberaj, duke shtuar:

“Besoj që shfaqja do të zgjojë një interesim në shoqërinë tonë, por gjithashtu do të jetë interesante për prezantim edhe jashtë vendit. Unë uroj që të ketë jetë sa më të gjatë e të prezantohet edhe në festivale ndërkombëtare të teatrit.”

Ndryshe, regjinë e shfaqjes “Burrnesha” e ka bërë Erson Zymberaj, e shkruar nga Jeton Neziraj ndërsa në shfaqje luajnë aktorët: Tringa Hasani, Semira Latifi dhe Kushtrim Qerimi.

Premiera e shfaqjes është sot në ora 20:00, ndërsa do të jepet edhe me 11 e 12 maj, në Teatrin Oda në Prishtinë.