Sot provimi i parë i Maturës Shtetërore, testohen njohuritë në gjuhën e huaj

Sot zhvillohet provimi i parë i Maturës Shtetërore ku 28 mijë maturantë në të gjithë Shqipërinë do të testojnë njohuritë e tyre në provimin e gjuhës së huaj.

Ministrja e Arsimit, Ogerta Manastirliu zhvilloi një takim me grupin e monitoruesve ku përcaktoi detyrat dhe penalizimet nëse rezultojnë shkelje. Manastirliu shprehu urimet më të mira dhe inkurajon maturantët që sot nisin këtë etapë të rëndësishme të jetës së tyre me provimin e parë, atë të gjuhës së huaj, e më pas me gjuhën shqipe dhe letërsinë, matematikën dhe lëndët me zgjedhje.

“Sot është një ditë e rëndësishme për rreth 28 mijë nxënës-maturantë në të gjithë Shqipërinë, të cilët do të kryejnë Provimet e Maturës Shtetërore, duke filluar me gjuhën e huaj, gjuhën shqipe dhe letërsinë, matematikën dhe më pas me lëndët me zgjedhje. Ky moment shënon përfundimin e një etape dhe hapjen e kapitullit të ri në rrugëtimin tuaj drejt dijes dhe aftësimit tuaj të mëtejshëm,” u shpreh ministrja e Arsimit duke inkurajuar maturantët që të zgjedhin universitetet shqiptare për të vijuar studimet e tyre..

Provimi i gjuh huaj i cili ka nisë në orën 10:00 do të zgjasë 2 orë e 30 minuta në 144 qendra provimi që do të administrohen nga 2700 punonjës arsimorë të të gjitha strukturave, të angazhuar për të administruar dhe monitoruar procesin e Maturës Shtetërore.

Pas provimit të gjuhës së huaj, më 10 qershor maturantët do t’i nënshtrohen provimit të Gjuhës Shqipe dhe Letërsisë, më pas më 18 qershor do kenë matematikën ndërsa më 24 qershor është provimi i fundit, ai i lëndës me zgjedhje.