Qeveria e re Kosovës, BE: Tani të veprohet me shpejtësi në zbatimin e reformave

Sot kur Qeveria e re e Kosovës e cila o votua mbrëmjen e së mërkurës mbanë edhe mbledhjen e parë, nga Brukseli zyrtar mbërrijnë edhe urimet e para në pritje që të veprohet me shpejtësi në zbatimin e reformave.

Shefja e politikës së jashtme të Bashkimit Europian, Kaja Kallas, duke uruar Kryeministrin Albin Kurti tha se pas më shumë se një viti bllokim politik, formimi i qeverisë së re të Kosovës është një lajm inkurajues.

“Pas më shumë se një viti bllokade politike, formimi i qeverisë së re të Kosovës është një lajm inkurajues. Urime Albin Kurtit. Ajo që ka rëndësi tani është që të veprohet me shpejtësi në zbatimin e reformave. Kjo është mënyra më e shpejtë për të zhbllokuar mbështetjen e BE-së me vlerë qindra milionë euro dhe për të shënuar përparim në rrugën drejt BE-së,” shprehet Kaja Kallas përmes rrjetit social X duke e konsideruar si një moment të ri për të avancuar marrëdhëniet BE-Kosovë dhe dialogun ndërmjet Kosovës dhe Serbisë.

Ndërsa Komisionerja Evropiane për Zgjerim, Marta Kos, duke uruar Kryeministrin Albin Kurti për formimin e qeverisë së re tha se fokusi tani mund të zhvendoset në avancimin e reformave të BE-së

“Lajm i mirë nga Prishtina sot. Kuvendi është në detyrë. Një qeveri e re ka marrë detyrën. Urime Kryeministër Albin Kurti. Fokusi tani mund të zhvendoset në avancimin e reformave të BE-së dhe sjelljen e përfitimeve të plota të Planit të Rritjes në Kosovë. Pres me padurim të vizitoj Kosovën së shpejti,”u shpreh përmes rrjeteve sociale Komisionerja Evropiane për Zgjerim, Marta Kos.

Ndryshe, mbrëmë me konstituimin e Parlamentit të Kosovës, me kryetare Albulena Haxhiu dhe pesë Nënkryetarë,  Ardian Gola nga LVV, Vlora Çitaku nga PDK, Kujtim Shala nga LDK, Slavko Simiç nga Lista Serbe dhe Emilja Rexhepi nga grupi multietnik, u votua dhe Qeveria e re me Kryeministër Albin Kurti nga partia fituese e zgjedhjeve të 28 dhjetorit, Lëvizja Vetëvendosje.