Sot, Scholz pret Kurtin, Vuçiçin dhe Lajçakun në Berlin

Sot kancelari gjerman, Olaf Scholz, do të presë në selinë e tij në Berlin kryeministrin e Kosovës, Albin Kurti, dhe më pas, presidentin e Serbisë, Aleksandar Vuçiç.

Këtë e bëri të ditur zv/zëdhënësi i qeverisë gjermane, Wolfgang Büchner, në kuadër të konferencës së rregullt të qeverisë gjermane për media në Berlin.

Në qendër të të dy takimeve veç e veç, do të jenë “qëndrimet ndaj luftës agresore të Rusisë në Ukrainë, bashkëpunimi rajonal dhe marrëdhëniet dypalëshe mes dy vendeve”, tha Büchner.

Kurti dhe Vuçiç, raporton DW, do të takohen në Berlin, po atë mbrëmje, në prani të ndërmjetësuesit të BE-së për çështjen e dialogut, Miroslav Lajçak, i cili vjen në Berlin me ftesë të kancelarit Scholz.

Mësohet se axhenda e takimit të Kryeministrit të Kosovës, Albin Kurti në Berlin fillon në orën 15:00, kur  Kancelari Scholz do të përshëndesë kryeministrin Kurti dhe delegacionin në hyrje të ndërtesës.

Sipas protokollit, pas hyrjes, kancelari do të prezantojë delegacionin e tij dhe më pas do të vijojë prezantimi i delegacionit kosovar nga kryeministri Kurti.

Nga ora 15:00 deri 16:00, do të ketë takim dypalësh ndërmjet kancelarit Olaf Scholz dhe kryeministrit Albin Kurti.

Nga ora 16:00 deri 16:30, Scholz e Kurti do të mbajnë konferencë të përbashkët për media.

Fillimisht një deklarim do ta bëjë kancelari Scholz e pastaj kryeministri Kurti, para se gazetarët të kenë mundësi t’u bëjnë nga dy pyetje secilit prej tyre.

Në orën 19:45, do të shtrohet darkë, ku i pranishëm do të jetë edhe Miroslav Lajçak dhe kancelari Scholz.