Sot seanca e fundit, por LSI kërkon që Kuvendi mos nisë pushimet…

LSI kërkoi sot në seancën e fundit të sesionit parlamentar që Kuvendi të mos nisë pushimet, port ë qëndrojë i mbledhur deri në gjetjen e konsensusit mes pozitës dhe opozitës lidhur me ligjin për Magjistraturën.

Ndonëse opozita e ka cilësuar ligjin në fjalë si një përpjekje tjetër të Edi Ramës për të kapur drejtësinë, por edhe si një mashtrim që po i bëhet opinionit, pasi miratimi i draftit nuk i jep zgjidhje kaosit të krijuar në Kushtetuese dhe Gjykatën e Lartë, pasi shumica e anëtarëve të dy hallkave më të rëndësishme të gjyqësorit nuk kaluan vettingun, duket se propozimi i bërë sot në seancë nga deputeti Luan Rama është mirëpritur nga socialistët.

Gramoz Ruçi, kreu i Kuvendit, tha se është i gatshëm në çdo moment të thërrasë Kuvendin për miratimin e ligjit, nëse do të ketë konsensus mes palëve.

“Eshtë i domosdoshëm takimi i aktorëve parlamentarë në këtë moment. Ju kërkoj ju si kryetar i Kuvendit ta zgjidhni këtë situatë. Nuk është problem vetëm çështja e magjistratëve, por është problem shumë i madh Gjykata Kushtetuese. Kuvendi duhet të mos shpërndahet derisa të zgjidhen problemet e Reformës në Drejtësi”, tha Luan Rama.

Ndërsa Ruçi u shpreh se “seanca do të vazhdojë, unë do të jem në dispozicion të këtij dialogu. Sapo të kem një përgjigje nga PD, do të thërras një takim me grupet parlamentare, siç ju kërkuat”.