Sot seanca plenare, Taulant Balla bastardon edhe vendimin e Edi Ramës
Pas vendimit të kryeministrit Edi Rama përmes shokut Gramoz për të zhvilluar sot seancën plenare edhe pse Rendi i Ditës nuk arsyeton si vendimin ashtu edhe urgjencën me të cilën është arsyetuar mazhoranca, kryetari i Grupit Parlamentar të PS, e bastardoi edhe më shumë spostimin e seancës plenare për sot në orën 17:00 duke e ndërlidhë me 14 Marsin dhe ballokumet që ai do ti shpërndajë elektoratit i cili nuk ka as bukë për të ngrënë.
“Sot pasdite Kuvendi do të shqyrtojë dy vendime të rëndësishme që kanë të bëjnë me strukturën e dy institucioneve të drejtësisë së re KLGJ dhe KLP. Sa më shumë do të afrohet dita e konsolidimit të drejtësisë së re, sa më shumë afrohet dita për ngritjen e SPAK dhe BKH do të kemi këtë edhe këtë sjellje antidemokratike, antikushtetuese, jo ligjore të opozitës,” tha Taulant Balla thuajse e ka penguar njeri deri më sot që të miratoj këto Pika të Rendit të Ditës kur dihet se si KLGJ ashtu edhe KLP do të kenë struktura që janë miratuar nga Partia Socialiste.
Por Balla dha një arsye edhe më të fortë se KLGJ dhe KLP, pse sot do të zhvillohet seanca, që duhet pranuar se është më bindëse se ajo që e kishte urdhëruar Edi Rama për të thënë:
“Në datën 14 mars nuk zhvillohet seancë se është ditë gëzimi dhe feste i shqiptarëve dhe për mua si deputet i Elbasanit, dhe i ftoj të gjithë të vijnë në Elbasan për ditën e verës, ajo që u them është që u miratua kalendari dhe programi dhe ne do të vijojmë të miratojmë ligje shumë të rëndësishme të Paketës në Drejtësi, sot kemi edhe dy ligje shumë të rëndësishme që kanë të bëjnë me hallin e mijërave në zonat rurale që nuk kanë marrë dot tapinë, me dy ligjet që miratojmë sot i japim zgjidhje këtij halli,” thekson kryetari i Grupit Parlamentar të PS, Taulant Balla për tapitë të cilat vazhdojnë të jenë premtim elektoral edhe pse është viti i gjashtë i qeverisjes ndërkohë qytetarët vazhdojnë të sorollaten nëpër Shqipëri tavolinash me “tapitë e Lamçes” në dorë që i dhuronte Edi Rama nga Vermoshi në Konispol.
