Sot shënohet 27 vjetori i gjenocidit në Srebrenicë, ceremoni varrimi edhe për 50 persona

Sot shënohet 27 vjetori i gjenocidit serb ndaj meshkujve boshnjakë në Srebrenicë ku do të varrosen edhe 50 viktima të identifikuara.

Ceremonia fillon në orën 11:00 në Qendrën Memoriale Potoçari ku personi më i moshuar që do të varroset është 59 vjeçari Husein Krxhiç ndërsa janë dhe tre minorenë që në momentin e ekzekutimit ishin vetëm 16 dhe 17 vjeç.

Gjithashtu, sot do të bëhet dhe zhvarrimi i 85 trupave të pajetë, ku do ti shtohen pjesën tjera të skeletit që janë identifikuar më vonë. Procesi i zhvarrimit pritet të zgjasë 7 ditë.

Aktualisht në Potoçari janë varrosur 6.671 viktima.

Dënimi i kriminelëve

Gjenocidi në Srebrenicë ka ndodhur nga 13. deri 19 korrik 1995 pasi forcat serbe u futën në zonën e mbrojtur nga OKB më 11 korrik. Gjatë këtyre ditëve në Srebrenicë janë vrarë 8.372 meshkuj të paarmatosur nga rajoni i Srebrenicës. Vrasjet janë kryer nga ushtarët e Ushtrisë së Republikës Srpska dhe forcat speciale të Ushtrisë së Serbisë “Skorpioni”.

Rreth 50 dënime janë dhënë për kriminelët që kanë planifikuar dhe realizuar gjenocidin ndaj meshkuve boshnjakë në Srebrenicë. Janë vrarë 8.372 boshnjakë, e kriminelët serbë janë dënuar me rreth 700 vjet burg duke përfshirë dhe 5 dënime të përjetshme. 

Krimineli i parë serb i cili e pranoi fajin para Gjykatës së Hagës ishte Drazhen Erdemoviç. Ai u dënua në dhjetorin e vitit 1996 me 5 vjet burg. Pas tri viteve e gjysëm, Erdemoviç është liruar, ndërsa bazuar në dëshminë e tij në vitin 2001 është dënuar gjenerali serb Radislav Krstiç me 35 vjet burg.

Personi i fundi ti cili u dënua për këtë gjenocid ndaj meshkujve boshnjakë në Srebrenicë, është komandanti i Ushtrisë së Republika Srpska, Ratko Mlladiç, të cilin Gjykata e Hagës e dënoi me burgim të përjetshëm.