Sot, Shkodra proteston kundër sundimit të krimit!

Sot Partia Demokratike ka thirrë një protestë në Shkodër, ku me bekimin e Edi Ramës, qyteti është nën sundimin e krimit.

Duke konfirmuar ardhjen në pushtet të Benet Becit me krimin në Shkodër, ngjarja e fundit mafioze me tre viktima në lagjen Dobraç alarmoi qytetarët tashmë të bindur se situatën nuk e zgjidh dot rilindja e Edi Ramës dhe as banda e policisë sepse ata janë palë në fushatë për të ruajtur njëri tjetrin, sot thirren nga Partia Demokratike të bashkohen në pedonale para bashkisë, në ora 12:00, në marshim!
Në marshim kundër kthetrave të krimit, për t’i kthyer qetesinë banorëve të Shkodrës!

Kryetari i Partisë Demokratike, Sali Berisha, duke bërë thirrje për protestë në orën 12:00 tha se duhet të jemi në Shkodër sot, për tu dëshmuar qytetarëve fisnik të Shkodrës, se ata në asnjë rrethanë, në asnjë rast, nuk janë dhe nuk do të jenë vetëm, por do të kenë mbështetjen e të gjithë shqiptarëve të vërtetë, kudo që janë.
“Nuk mund të flas kreu i bashkisë se, mandati i tij qëndron mbi krimin. Nuk mund të flas kreu i prefekturës, sepse votat e tij janë votat e krimit. Nuk mund të flas ministri i krimit, sepse drejtori i tij, është drejtori i krimit. Ndaj dhe heshtin njëri pas tjetrit, si ministria, ashtu dhe Proda i krimit, zyrtarë të tjerë, gjer tek Edi Rama. Ndaj dhe ne të gjithë të tjerët, duhet të ngrihemi fuqishëm, nuk duhet të heshtim kurrë,” tha Sali Berisha i bindur se sot të gjithë duhet të jenë në Shkodër, për të dëshmuar se jemi të pamposhtur, se bandat e qeverisë dhe as qeveria e tyre nuk na mposhtin kurrë.

“Ftoj çdo qytetar të marshojë sot në Shkodër, sepse Flutura Basha mund të ishte secili prej nesh, secili nga të dashurit tanë, secili nga fëmijët tanë. Ndaj dhe të marshojmë në Shkodër, sepse masakra ishte e paralajmëruar,” tha Kryetari i PD, Sali Berisha, duke përfunduar:

“Ne jemi të gatshëm në këtë betejë për përballje dhëmb për dhëmb me këta kriminelë dhe për të fituar.”

Ndryshe, të mërkurën e 30 Tetorit, rreth orës 15:30 në lagjen Dobraç të Shkodrës, dy makina i prenë rrugën një Mercedesi i cili u qëllua me breshëri kallashnikovi, ku për pasojë plumbat bien mbi drejtuesin e mjetit, makina devijoi dhe u përplas fillimisht me një motor në të cilin udhëtonte çifti, Bashkim dhe Flutura Basha dhe më pas me murin rrethues të një ndërtese.

Në mjetin e bërë shoshë, shoferi Hamza Lici, 23 vjeç, që ishte dhe shënjestra e këtij atentati mafioz, mbeti i vrarë, ndërsa pasagjeri Arlind Bushati, ndërroi jetë në spital.

Nga përplasja, gruaja Flutura Basha gjeti vdekjen në vendin e ngjarjes, ndërsa bashkëshorti i saj, Bashkim Basha ndodhet në gjendje të rëndë për jetën në spitalin e Shkodrës. 

Policia si përherë humbi gjurmët e atentatorëve dhe mblodhi gëzhojat në vendin e ngjarjes, ndërsa përplasja dhjetëvjeçare në mes fiseve Lici dhe Bajraj vazhdon edhe pas vrasjes së mbi 20 personave, me qëllim të influencës në tregjet e qytetit të Shkodrës, dhe, prapa hekurave, normalisht në shtetin e Edi Ramës, nuk përfundoi njeri përveç një fëmije 15 vjeç, i cili tha se ishte dëshmitar i vrasjes së Endri Mustafës në një parcelë droge, ku ekzekutimin e kishte kryer Ibrahim Lici.