Sot Shqipëria me hartë të re gjyqësore, vetëm një Gjykatë Apeli ndonëse me 32 mijë dosje në pritje

Sot hyn në fuqi harta e re gjyqësore kur nis dhe funksionimi i Gjykatës së Apelit të Juridiksionit të Përgjithshëm në Tiranë.

Kjo Gjykatë e Apelit ku tashmë janë shkrirë pesë gjykata Apeli nga rrethet me 11 mijë dosje në pritje, duke e rritur stokun e dosjeve në pritje në 32 mijë, sipas vendimit të Këshillit të Lartë Gjyqësor do të ketë në strukturë 78 gjyqtarë, që i pret një shqyrtim mesatar prej 217 dosje në rang vendi.

Me shkrirjen e Gjykatave të Apelit në Shkodër, Vlorë, Durrës, Korçë dhe Gjirokastër, do të mbeten hapur vetëm një zyrë informacioni për qytetarët ku do të punojnë tre nëpunës civilë gjyqësorë, në shërbim të qytetarëve për të depozituar kërkesat.

Gjithsesi, përkundër faktit se këto 5 Gjykata të Apelit janë shkrirë tashmë në një të vetme dhe të gjitha dosjet gjyqësore janë transferuar dhe grumbulluar në Gjykatën e së Apelit të Juridiksionit të Përgjithshëm në Tiranë, ajo do të funksionojë pasi të ketë përfunduar procesi i vettingut për gjyqtarë dhe prokurorë, proces i cili detyroi KLGJ-në të hartojë një hartë të re gjyqësore për shkak të humbjeve të mëdha që pati sistemi i drejtësisë me gjykatës dhe prokurorë që pësuan në vetting.

Ndryshe, Këshilli i Lartë Gjyqësor shkriu 18 gjykata duke reduktuar gjykatat e Apelit në një të vetme në Tiranë, duke hequr pesë gjykatat administrative që do jenë në vetëm dy, një në kryeqytet dhe një në qytetin e Lushnjës dhe duke lënë vetëm 13 gjykata të Shkallës së Parë nga 22 sa ishin.