Sot sprova e opozitës për ta kufizuar “pazarin e Thaçit” në Bruksel

Pas dy dështimeve, sot në orën 10 është parashikuar të zhvillohet seanca e opozitës për të debatuar lidhur me angazhimet e Presidentit të Kosovës për përfshirjen e “shkëmbimit të territoreve” apo “korrigjim të kufijve” në dialogun në mes të Kosovës dhe Serbisë.

Mbrëmë opozita nuk arriti të mbledhë 61 deputetët e nevojshëm për zhvillimin e seancës, pasi që AAK hoqi dorë nga mbështetja e premtuar për LDK, Vetëvendosje dhe PSD, që me miratimin e një Rezolutë të vëjnë nën kontroll përfaqësimin e Presidentit Hashim Thaçi në dialog me Serbinë në Bruksel, duke I përjashtuar atij mundësinë e dialogimit rreth “shkëmbimit të territoreve” apo “korrigjimit të kufijve”.

Mbrëmë pas dështimit të dytë të zhvillimit të seancës, Kryetari i Parlamentit të Kosovës, Kadri Veseli kërkoi kordinim mes grupeve parlamentare për shkak se siç tha ka një mos koordinim në mes vete, dhe dështimet e palëve, ky i opozitës dhe ai i mazhorancës me miratimin e Ekipit Negociator, Veseli mendon se mund të zgjidhen.

“Do të ishte mirë që të mbahet një mbledhje e kryesisë dhe nëpërmjet një koordinimi të mbahet një seancë e përbashkët në mes pozitës dhe opozitës.”

Ndryshe, kanë ngelur vetëm edhe 24 orë deri tek takimi i Brukselit, në mes të Kosovës dhe Serbisë, dhe shteti i Kosovës nuk e ka përcaktuar as grupin që do ta përfaqësoj dhe sërish i lejon Presidentit të Kosovës të marr pjesë në dialog me idetë e tij konfuze nga Medvegja në Ujman.