Sot Tërnoci voton për mandatin e deputetit shqiptar, Albin Kurti: Votoni Shaip Kamberin!
Sot në vendvotimin nr. 6 në Tërnoc të Madh të Bujanocit po përsëriten zgjedhjet për deputet në Parlamentin e Serbisë ku kandidatit të Koalicionit të Shqiptareve të Luginës, Shaip Kamberi i duhen 650 vota për ta fituar mandatin e deputetit.
Duke ftuar shqiptarët që ta votojnë Shaip Kamberin, Kryeministri i Kosovës, Albin Kurti tha se një përqindje e vogël e votave mund të ndryshojë situatën dhe shqiptarët të mund të marrin një ulëse në Parlamentin e Serbisë.
“Ju ftoj që sot, më 28 prill, të gjithë ju më të drejtë vote, të shkoni në vendvotimin numër 6 në Tërnoc dhe të votoni për Koalicionin e Shqiptarëve të Luginës, të votoni për Shaip Kamberin,” tha Albin Kurti duke rikujtuar se për dy mandate përfaqësimi, Shaip Kamberi ka qenë gjithmonë i zëshëm gjatë seancave parlamentare në mbrojtje të të drejtave të shqiptarëve dhe në denoncimin e regjimit autokratik në Serbi.
Ndryshe këto zgjedhje janë përsëritur me vendim te Komisionit Republikan te Zgjedhjeve. Të drejtë vote në këtë vendvotim kanë 1089 qytetarë derisa janë të nevojshme 650 vota që kandidati i Koalicionit të Shqiptareve të Luginës, Shaip Kamberi të mund të fitojë një ulëse në Parlamentin e Serbisë.
Më 03 prill, Koalicioni kishte 9.693 vota, të pamjaftueshme këto për të fituar mandatin në Parlamentin e Serbisë. Në qendrën e votimit 06 ku sot po përsëritet votimi, me 03 prill kanë votuar 226 qytetarë.
