Sot zgjedhet Kryesia e re e PD
Sot Këshilli Kombëtar i Partisë Demokratike pritet të zgjedhë Kryesinë e re të PD prej 20 anëtarëve nga 47 kandidatë që miratoi një ditë më parë Komisioni i Rithemelimit.
Kryetari i Këshillit Kombëtar të PD, Edi Paloka, pasi konstatoi se 200 anëtarë janë të pranishëm dhe plotësohet kuorumi i dha fjalën Kryetarit të Partisë Demokratike, Sali Berisha, Duke fol në fillim për Komisionin e Rithemelimit dhe pse ishte e domosdoshme kjo nismë, Berisha sulmoi ashpër kryeministrin Edi Rama si të lidhur me bandat kriminale në vend tha para Këshillit Kombëtar se hapjen e negociatave të Shqipërisë me BE-në e penguan lidhjet e kreut të Qeverisë me bandat e Elbasanit, Durrësit dhe Shkodrës.
“Pse e Rithemeluan anëtarët PD-në? Sepse e panë që Shqipëria humbi orientimin e saj europian perëndimor, humbi vokacionin perëndimor të kombit tonë. Hapja e negociatave u shndërrua në një horizont të pakapshëm dhe këtu tani Edi Rama fajin e gjen te Europa dhe përpiqet të kërcënojë europën. Faji nuk është te Europa. Ajo ka problemet e veta. Çdo organizim ka problemet e veta, por nuk janë kurrë këto problemet të cilat na lanë ne 8 vite me zero progress dhe na futën në skema të tjera të cilat mund të devijojnë përfundimisht rrugën e integrimit. Çfarë na pengon ne? Ne na penguan lidhjet e Edi Ramës me krimin. Bjellivuku i Beogradit është Dumani i Tiranës. Një serial killer që vret për llogari të bandave të qeverisë. Cili nuk dinte lidhjet direkte të Ramës me bandën e Elbasanit, Durrësit, Shkodrës? Cili nuk i dinte lidhjet patologjike të Taulant Ballës, me Suel Celën dhe Begon? Të gjithë i dinin. Tani ato kanë dalë sheshit.
Disa muaj më parë në mediat botërore ujku i bardhë i Beogradit u bë personazh i krimit. Tani del qartë se Ramën dhe Vuçiç i bashkon lidhja e tyre me krimin. Dokumente të pakundërshtueshme, akte zyrtare faktojnë se Edi Rama drejton sot një organizatë të vërtetë kriminale,” tha Sali Berisha ndërsa iu drejtua Këshillit Kombëtar se 44 mijë anëtarë të PD presin nga ne të kundërshtojmë politikën antikombëtare të Edi Ramës.
“Ata janë të gatshëm për beteja, presin vetëm udhëheqjen tuaj. Pse rithemeluan anëtarët PD? Sepse ata ndjejnë dhimbje të madhe, dëshpërim të thellë kur shohin kombin të shpërbëhet çdo ditë. Betejë, drejtim, betejë për interesin kombëtar! S’ka mision më të madh sesa të ngrihemi dhe t’i shkurtojmë ditët kësaj qeverie. Ata që mendojnë se është regjim i fortë, gabojnë. Është e vërtetë që ka para korrupsioni, që vret njerëz në komisarit, por e vërteta tjetër më e madhe është që ky regjim është kalbësirë.”
Me përfundimin e fjalës së Kryetarit të PD, Sali Berisha, filloi dhe procesi i votimit të zgjedhjes së Kryesisë së PD prej 20 anëtarëve.
Ndryshe, 47 kandidatët për anëtarë Kryesie që u miratuan nga Komisioni i Rithemelimit janë: Agron Shehaj; Albina Deda; Aldo Bumcci; Arben Imami; Arben Ristani; Bardh Spahia; Bedri Blloshmi; Belind Kellici; Bledi Kasmi; Blendi Himci; Bujar Nishani; Clirim Gjata; Edith Harxhi; Edmomd Spaho; Elda Hoti; Eleina Qirici; Endira Bushati; Enno Bozdo; Erald Kapri; Ervin Minarolli; Fatbardha Kadiu; Flamur Noka; Floriana Garo; Florion Mima; Genc Deromemaj; Genc Pollo; Gent Strazimiri; Grigels Mucollari; Ina Zhupa; Indrit Hoxha; Isuf Cela; Ivi Kaso; Jozefina Topalli; Kasem Mahmutaj; Keltis Kruja; Klevis Balliu; Lediana Fratari; Ledina Mandija; Liljana Elmazi; Lorenc Luka; Luan Baci; Luciano Boci; Mimoza Hajdarmataj; Mirela Tabaku; Oerd Bylykbashi; Sorina Koti dhe Tritan Shehu.
Ndërkohë sot pritet të zgjedhen edhe Nënkryetarët dhe Kryetari i Grupit Parlamentar të PD.
