Sot zgjedhjet për Kryetarë të Degëve nga Kukësi në Sarandë, ja kandidatët
Sot në kuadër të procesit të Rithemelimit, Partia Demokratike zhvillon zgjedhjet për Kryetar në Degët e PD: Kukës, Has, Kamëz, Kavajë, Sarandë, Delvinë, Gjirokastër, Vlorë, Memaliaj, Tepelenë, Patos, Cërrik, Përmet, Këlcyrë, Pogradec dhe Degët e PD në Tiranë 3, 9, 13.
Në Kukësin e përçarë në mes të demokratëve që vazhdojnë ti qëndrojnë besnik kundërshtimit të tradhëtisë që i bëri Lulzim Basha dhe dhjetëra demokratëve që e adhurojnë këtë tradhëti, në garë për kryetarin e ri të Partisë Demokratike Dega Kukës janë Admir Sinamati dhe Irel Elezi.
Garë për kreun e Partisë Demokratike sot do të ketë edhe në Degën e Patosit të qartë që nga shkëndijat e para të devijimit të Lulzim Bashës nga djersa dhe sakrifica demokrate. Në garë për kreun e PD Dega Patos janë, Ardian Rama dhe Shezaim Ymeraj.
Dhe, anëtarët e Partisë Demokratike në Pogradec do iu drejtohen sot kutive të votimit për të votuar Kryetarin e ri ku në garë janë dy kandidatë. I pari është Genti Çela, një 34 vjeçar i cili vjen nga radhët e Forumit Rinor të Partisë Demokratike dhe prej 2 vitesh ishte Sekretar Organizativ i PD Dega Pogradec. Kandidatura e dytë është Kasem Galla i cili Kryetar i kësaj Dege ishte në vitet 2016-2019.
Edhe Partia Demokratike Dega Vlorë sot do të zgjedhë kryetarin e ri ku në garë janë katër kandidatë: Atird Hoxha, Edmond Banushaj, Fatjon Fejzaj dhe Lorenc Danaj.
Ndërkohë që demokratët gjirokastritë kanë vendosur që të ardhmen e tyre t’ia besojnë të rinjëve dhe si rrallëherë në garë për kryetarin e Partisë Demokratike Dega Gjirokastër janë dy të rinjët, Eri Shehaj dhe Daniel Sino.
Për kreun e PD Dega Sarandë sot garojnë katër kandidatë, një arkitekte përballë tre avokatëve: Manjola Nikollo, Brigels Dervishi, Elvis Kuci, Robert Haxhi.
Ndryshe, dje në garën pë kryetar dje janë konfirmuar kryetarët e Degëve:
1.PD, dega Elbasan, kryetar i ri zgjidhet Ferdinand Himci me 66% të votave.
2.PD, dega Kuçovë, kryetar i ri zgjidhet Myslym Isuf Haxhi me 57% të votave.
3.PD, dega Skrapar, kryetar i ri zgjidhet Hajredin Lahe Bakiasi me 69% të votave.
4.PD Dega 6 Tiranë, kryetare e re zgjidhet Onelda Gjin Zefi me 79.7 % të votave.
5.PD Dega 10 Tiranë, kryetar i ri zgjidhet Andi Gani Beliu me 65% të votave.
6.PD Dega 16 Tiranë, kryetar i ri zgjidhet Eduard Gani Rexha me 69.7% të votave.
7.PD Dega Paskuqan, kryetar i ri zgjidhet Anton Lek Pjetërnikaj me 86% të votave.
8.PD Dega 11 Tiranë, kryetar i ri zgjidhet Shkelxen Mark Mustafaj.
Sipas Komisionit të Rithemelimit, zgjedhjet për kryetarët e degëve të PD do të përfundojnë më 20 prill. 10 ditë më pas, Rithemelimi mbledh Kuvendin Kombëtar, nga ku do të nisë procesin për zgjedhjen e kryetarit të Partisë Demokratike.
