Southgate: Ndaj Kolumbisë për ta thyer mallkimin

Anglia kërkon që të vazhdojë rrugëtimin drejt finales së Botërorit.

Shpresat e anglezëve që mund ta rikthejnë Kupën e Botës në vendin ku ka lindur futbolli, janë shumë të mëdha dhe pas ndeshjeve të mira në fazën e grupeve ata besojnë se ky mund të jetë viti i tyre.

Në 1/8 e finales, “Tre Luanët”, do të ndeshen me një kundërshtar mjaft të fortë siç është Kolumbia, por sipas trajnerit të Anglisë, Gareth Southgate, lojtarët e tij janë të gatshëm të luftojnë deri në fund për të arritur çerekfinalen.

“Kanë kaluar dhjetë vite që nuk arrijmë të fitojmë një ndeshje me eliminim direkt në garat ndërkombëtare. Por ky është një rast i mrekullueshëm për të thyer këtë mallkim e tabu, për të shkuar me larg se ç’kanë bërë ekipet e tjera kombëtare, të cilat kanë edhe më shumë përvojë se ne”, ka thënë fillimisht Southgate.

“Përballë nesh do të jetë një kundërshtar shumë i fortë për të cilin kemi respekt. Ne duhet të ruajmë stilin tonë të lojës, mentalitetin tonë të të luajturit futboll, ashtu siç kemi treguar deri më tani në këtë turne. Duke treguar rezistencë dhe mbi të gjitha liri në lojën tonë”.

“Ne jemi Anglia, kemi shumë yje që do të dinë të tregojnë vlerën e tyre dhe që nuk kanë problem presionin e sfidave të tilla”, ka përfunduar ai.

Ndeshja mes Anglisë dhe Kolumbisë zhvillohet nga ora 20:00.