Spahn: Gjermania mund ta ketë një vaksinë për COVID-19 në muajt e ardhshëm

Ministri gjerman i Shëndetësisë, Jens Spahn, tha sot se në muajt e ardhshëm, apo përfundimisht vitin e ardhshëm 2021 do të zbulohet një vaksinë ndaj COVID-19.

Më 12 gusht, Agjencia e Shëndetit publik në Gjermani fillimisht publikoi një raport ku thoshte se në vjeshtë do të ketë një vaksinë por, më pas, dokumenti u fshi nga faqja zyrtare e Institutit Robert Koch, RKI.

Instituti tha se dokumenti nuk ishte i përditësuar dhe ishte botuar gabimisht, raporton Reuters.

“Unë jam optimist se në muajt e ardhshëm, dhe sigurisht në vitin e ardhshëm, mund të ketë një vaksinë,” tha Spahn për televizionin gjerman ZDF.

Spahn nuk pranoi të caktojë një muaj specifik në të cilin vaksina do të ishte e gatshme, duke thënë se akoma nuk është e mundur të përcaktohej se sa shpesh njerëzit kanë nevojë të vaksinohen ose sa do të zgjaste imuniteti nga ajo vaksinë.

“Por, një gjë që mund të themi është se falë të gjithë neve që punojmë së bashku – studiuesve, shkencëtarëve, publikut – me siguri do të kemi një vaksinë më shpejt se kurrë më parë në historinë e njerëzimit,” tha ministri gjerman i Shëndetësisë.

Presidenti rus, Vladimir Putin, njoftoi të martën se Rusia ishte vendi i parë që ka miratuar një vaksinë ndaj COVID-19.

Por Spahn përsëriti dyshimet e tij për atë vaksinë, të quajtur “Sputnik V”, duke thënë se kishte relativisht pak të dhëna për të.

Sot në Gjermani janë regjistruar 1.445 raste të të infektuarve me koronavirusin e ri, raporton RFE, duke e çuar numrin e përgjithshëm në 219.964.

Instituti Robert Koch, RKI, raportoi se janë shënuar edhe katër vdekje.

Deri më tani, në Gjermani nga sëmundja COVID-19, kanë humbur jetën 9.211 persona.