SPAK çon për gjykim deputetin e PS, GJKKO: Të pandehur, Plarent Ndreca dhe 15 zyrtarë të tjerë

Gjykata e Posaçme e Shkallës së Parë për Korrupsionin dhe Krimin e Organizuar, GJKKO, ka vendosur sot dërgimin në gjyq të 16 të pandehurve të akuzuar për shkelje në tendera dhe falsifikim dokumentesh, në kuadër të çështjes penale nr. 240/2021 mes tyre edhe deputetin e PS, Plarent Ndreca.

Të akuzuarit Plarent Ndreca, Denisa Skënderaj, Blendi Kovi, Lira Kolasi, Ferdinant Tarazhi, Grida Isufi, Jonarda Qurku, Lindita Mukaj, Silva Dauti, Denisa Klosi, Julia Hysa, Elora Kokalari dhe Aida Shehi përballen me akuzën e “Shkeljes së barazisë së pjesëmarrësve në tendera apo ankande publike”, kryer në bashkëpunim.

Ndërkohë, Klejdi Meço, Emiliano Mehmeti dhe Erand Rroboçi akuzohen për “Falsifikim dokumentesh”.

Nga 16 të pandehurit, thuhet në njoftimin zyrtar, të gjithë, përveç Plarent Ndrecës, kanë kërkuar gjykim të shkurtuar.

Ndryshe, sipas vendimit të sotëm, raporton BW, trupa gjykuese e kryesuar nga gjyqtarja Elsa Ulliri ka pranuar kërkesën e Prokurorisë së Posaçme dhe ka dërguar çështjen për shqyrtim me një trup gjykues të ri prej tre gjyqtarësh.