SPAK i kërkon Belinda Ballukut të paraqitet sot në orën 15:00 për t’u njohur me akuzat

Zv/kryeministrja dhe ministrja e Infrastrukturës dhe Energjetikës, Belinda Balluku është thirrur sot në orën 15:00 për t’u paraqitur në Prokurorinë e Posaçme Kundër Krimit të Organizuar dhe Korrupsionit, SPAK, që t’i komunikohen zyrtarisht akuzat e ngritura ndaj saj.

Kjo është fletëthirrja e dytë drejtuar Belinda Ballukut, pasi herën e parë ajo nuk u paraqit në SPAK, sepse ndodhej jashtë vendit në një vizitë zyrtare.

Sipas ligjit, nëse refuzohet edhe fletëthirrja e dytë për t’u paraqitur në Prokurorinë e Posaçme, kjo e fundit mund të kërkojë shoqërimin përmes policisë të subjektit nën hetim.

Ndryshe, SPAK po heton Zv/Kryeministren dhe ministren e Infrastrukturës dhe Energjetikës, Belinda Balluku, për shkelje të barazisë në tenderat që lidhen pikërisht me tenderat e Llogarasë, ku më herët janë arrestuar vartës të saj, si ish-kreu i ARRSH-së Evis Berberi i cili po hetohet dhe gjykohet për disa akuza dhe ish-zyrtarë të tjerë.