SPAK jep urdhër për arrestimin e Adriatik Llallës, nuk u gjet në shtëpi nga policia

Pas vendimit të formës së prerë të Gjykatës së Posaçme të Apelit për Korrupsionin dhe Krimin e Organizuar, dhe urdhërit të Prokurorisë së Posaçme kundër Korrupsionit dhe Krimit të Organizuar, SPAK, për arrestimin e Ish-Prokurorit të Përgjithshëm, Adriatik Llalla, duke ngarkuar Policinë e Shtetit për ekzekutim, kjo e fundit vajti në shtëpinë e Llallës por nuk e gjeti aty.

Bashkëshortja e Ish-Prokurorit të Përgjithshëm, Adriatik Llalla, hapi derën e shtëpisë, u bë kontrolli ndërkohë ajo deklaroi se nuk e dinte se ku ishte bashkëshorti i saj.

Pas kontrolleve të policisë në banesë dhe mosgjetjes së tij, Ish-Prokurori i Përgjithshëm, Adriatik Llalla, është shpallur zyrtarisht në kërkim.

Njoftimi i SPAK

Mbi përfundimin e gjykimit ndaj të pandehurit Adriatik Llalla

Gjykata e Posaçme e Apelit për Korrupsionin dhe Krimin e Organizuar me vendimin Nr.24, datë 22.09.2021 vendosi:

“Lënien në fuqi të vendimit nr.40, datë 20.05.2021 të Gjykatës së Posaçme të Shkallës së Parë për Korrupsionin dhe Krimin e Organizuar”.

Gjykata e Posaçme e Shkallës së Parë për Korrupsionin dhe Krimin e Organizuar me vendimin nr.40, datë 20.05.2021 ka vendosur:

Deklarimin fajtor të pandehurit Adriatik Llalla për kryerjen e veprës penale “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publik ose i çdo personi tjetër që ka detyrimin ligjor për deklarim”, parashikuar nga neni 257/a, paragrafi 2 i Kodit Penal, 3 (tre) herë, dhe dënimin e tij me 2 (dy) vjet burgim.

Në bazë të nenit 35 të Kodit Penal heqjen e të drejtës për të ushtruar funksione publike për të pandehurin Adriatik Llalla për një periudhë 5 (pesë) vjeçare.

Pasuritë e paluajtshme të sekuestruara ku përfshihen:

Pasuria e paluajtshme apartament, me sipërfaqe 67.2 m2, e ndodhur në Durrës.

Pasuritë e paluajtshme të llojit tokë arë, 4 (katër) pasuri, me sipërfaqe gjithsejt 22.300 m2 të ndodhura në Tiranë.

Konfiskohen dhe kalohen në favor të shtetit.

Bazuar në faktin se vendimi i mësipërm i Gjykatës së Posaçme të Apelit për Korrupsionin dhe Krimin e Organizuar është i formës së prerë, Prokuroria e Posaçme kundër Korrupsionit dhe Krimit të Organizuar ditën e sotme, me datë 22.09.2021 ka nxjerrë urdhërin për ekzekutimin e këtij vendimi penal, duke ngarkuar Policinë e Shtetit për ekzekutimin e tij.