SPAK nuk i mbron dot gjyqtarët që shpëtuan Dritan Dajtin. Gjykata e Posaçme: Rihetim!

Gjykata e Posaçme ka rrëzuar kërkesën e çuditshme të prokurorëve të Prokurorisë së Posaçme Antikorrupsion dhe Krim të Organizuar që tashmë ka edhe emrin me namin e madh, SPAK, për 3 gjyqtarët e çështjes së Dritan Dajtit.

Ndonëse pritshmëritë për SPAK janë të mëdha ajo kërkoi pushimin e çështjes penale ndaj tre gjyqtarëve që pranuan gjykimin e shkurtuar për Dritan Dajtin duke e kthyer dënimin e përjetshëm në 25 vite burg.

Por sot Gjykata e Posaçme e ka kthyer për hetim çështjen e tre gjyqtarëve.

Arysteimi i prokurorisë për tre gjyqtarët, Skënder Damini, Petrit Aliaj dhe Aleks Nikolli, ishte se nuk janë gjetur elementë të veprës penale. Pas dyshimeve për korrupsion, tre gjyqtarët u hetuan por akuzat nuk u provuan dhe vendimi u mor nga prokurorët e SPAK, Klodian Braho dhe Donika Prela. Gjithsesi kjo nuk mjaftoi dhe Braho e Prela nuk arritën ti mbrojnë tre gjyqtarët shpëtimtarë të Dritan Dajtit sepse gjyqtarja Miljana Muça vendosi ta kthej çështjen për hetim.

Ndryshe, pas 10 vjet shtyerje të çështjeve gjyqësore ndaj Dritan Dajtit, Gjykata e Shkallës së Parë e dënoi me burgim të përjetshëm për vrasjen e efektivëve të Policisë Fato Xhani, Sajmir Duçkollari, Altin Dizdari, Kastriot Feskaj gjatë një operacioni për kapjen e tij. Po ashtu mbeti i vdekur edhe Ledio Mara si dhe i plagosur Fatjon Shamku, ndërsa u plagos dhe vetë Dritan Dajti.

Ndërkohë Gjykata e Krimeve të Rënda e dënoi Dritan Dajtin me katër burgime të përjetshme ndërsa Apeli i Krimeve të Rënda me trupën gjykuese, Skënder Damini, Petrit Aliaj dhe Aleks Nikolli, pranoi gjykimin e shkurtuar dhe e dënoi me 25 vite burg. Ky vendim ngjalli debat ndërsa ishte pikërisht ministrja e Drejtësisë Etilda Gjonaj e cila kërkoi hetim për gjyqtarët. Kryeministri Rama po ashtu e cilësoi si akt kriminal dhe premtoi se ky vendim do të zhbëhej. Prokuroria bëri rekurs në Gjykatën e Lartë kundër vendimit kurse gjyqtarëve iu bë kontroll në banesa.