Spanjë, ekzekutohet një emigrant shqiptar

Ekzekutohet me armë zjarri një emigrant shqiptar në Spanjë.

Mediat spanjolle raportojnë se rreth orës 00:45, në Reus të provincës Tarragona në Katalonjë, banorët vendas njoftuan policinë se kishin dëgjuar të shtëna me armë zjarri. Kur shkuan në vendngjarje, autoritetet gjetën të shtrirë në tokë një person, i cili pas verifikimeve rezultoi të jetë me origjinë shqiptare.

Sipas mediave spanjolle, shqiptari i vrarë është Fatmir A. i dënuar më parë për vrasjen e një 26-vjeçari të ndodhur në Cambrils në Shkurt të vitit 2008.

Policia spanjolle dyshon se 43-vjeçari Fatmir A. është ekzekutuar për hakmarrje

Ndryshe, më 29 Shkurt të vitit 2008, 43-vjeçari shqiptar Fatmir A. ekzekutoi me armë një 26-vjeçar në një pikë karburanti në Cambrils. Ai u arrestua më 20 Maj pas hetimeve të policisë, i cili u identifikua si autor i vrasjes së të riut. Në atë kohë, shqiptari mbante dokumente bullgare të falsifikuara. Krimi i ndodhur para 10 viteve u cilësua si larje hesapesh për çështje droge dhe prostitucioni.

Policia spanjolle po punon në zbardhjen e plotë të ngjarjes.