Spastrime politike në Shkodër, PD: Benet Beci pushon nga puna 180 kryefamiljarë!

Me skenarin e përsëritur të Rilindjes 2013, në Bashkinë Shkodër 180 kryefamiljarë përfunduan në rrugë në emër ristrukturimit, u shpreh sot Partia Demokratike përmes anëtarit të Kryesisë, Bardh Spahia, duke denoncuar spastrimin politik të kryebashkiakut Benet Beci i cili vazhdon dhe zbaton edhe këto lloj urdhra që merr nga Kryeministri Edi Rama dhe banda që e solli në pushtet.

“Të paktën 180 kryefamiljarë, gra dhe burra do të hidhen në rrugë me vendim të kryebashkiakut të paligjshëm, të emëruar nga krimi i organizuar, Benet Beci!

Ata do të zëvendësohen me shërbëtorë të bandës që solli në pushtet Benet Becin dhe kontrollon sot Bashkinë e Shkodrës,” shprehet Bardh Spahia duke konstatuar se për fat të keq hakmarrja e Rilindjes ndaj Shkodrës tashmë ka kaluar në urrejtje çnjerëzore.

“Ky është vetëm fillimi. Shkodranët do të ndiejnë në lëkurë çfarë do të thotë që Shkodrën nuk e qeveris vota e lirë, por krimi dhe korrupsioni. Çmimi i ujit do të rritet, taksat kanë nisur të rriten duke nisur nga tregtarët, nga kopshtet dhe çerdhet, tek ndërtimi, duke bërë akoma më të shtrenjtë jetesën në bashkinë me numrin më të madh të emigracionit gjatë 3-4 viteve të fundit,” tha anëtari i Kryesisë së Partisë Demokratike, Bardh Spahiu, duke shtuar se koha për të reaguar është tani ndërsa u zotua:

“Ne do të bëjmë gjithçka që kemi në dorë për t’u rikthyer Shkodrën shkodranëve!”

Deklaratë:

Të dashur qytetarë!

Për fat të keq hakmarrja e Rilindjes ndaj Shkodrës, dje kaloi në urrejtje të pakoceptueshme dhe çnjerëzore.

Të paktën 180 kryefamiljarë, gra dhe burra do të hidhen në rrugë me vendim të kryebashkiakut të paligjshëm, të emëruar nga krimi i organizuar, Benet Beci!

Me skenarin në përsëritje e sipër të Rilindjes 2013 për gjoja ristrukturim, po ndodh spastrim politik. Asgjë për t’u habitur nga një kryebashkiak që urdhrat i merr nga një kryeministër dhe nga një bandë që kanë frikë nga njerëzit e lirë dhe të ndershëm.

Por ajo që ka revoltuar shkodranët është mashtrimi me të cilën mbulohen spastrimet politike për llogari të Edi Ramës dhe krimit të organizuar në Shkodër!

Shkodranët nuk janë budallenj, por, njësoj si pjesa tjetër e shqiptarëve, kemi fatkeqësinë të kemi në krye një qeveri që nuk di të fitojë zgjedhje, përveçse t’i marrë ato ose me forcë, ose me para.
Ne provuam me prova filmike se në Shkodër këtë herë u përdorën të dyja këto mjete antidemokratike.

Shkodranët e dinë se 180 kryefamiljarë po ndëshkohen politikisht nga kukulla e bandave dhe e Edi Ramës në Shkodër, jo sepse ka patur abuzim me pozicionet e tyre të punës.

Historikisht, deri në vitin 2023, bashkia e Shkodrës ka marrë vlerësime të përvitshme si një ndër bashkitë e pakta në vend për menaxhimin e shkëlqyer financiar.
Kjo do të thotë se taksat e shkodranëve nuk janë vjedhur, nuk janë abuzuar, por i kanë shërbyer interesit publik.

Shkodranët nuk e meritojnë të tallen nga propaganda antinepotizëm e Benet Becit, personi që mbahet mend për abuzime dhe emërime skandaloze në KESH.
Media ka dokumentuar punësimin prej tij si këshilltarë në KESH të ortakëve të kompanisë së bashkëshortes.

Kjo që po nis me shkarkimin masiv të 180 burrave e grave të punës nuk sjell asnjë të mirë për Shkodrën. Ata do të zëvendësohen me shërbëtorë të bandës që solli në pushtet Benet Becin dhe kontrollon sot Bashkinë e Shkodrës.

Ky është vetëm fillimi. Shkodranët do të ndiejnë në lëkurë çfarë do të thotë që Shkodrën nuk e qeveris vota e lirë, por krimi dhe korrupsioni. Çmimi i ujit do të rritet, taksat kanë nisur të rriten duke nisur nga tregtarët, nga kopshtet dhe çerdhet, tek ndërtimi, duke bërë akoma më të shtrenjtë jetesën në bashkinë me numrin më të madh të emigracionit gjatë 3-4 viteve të fundit.

Koha për të reaguar është tani!

Ne do të bëjmë gjithçka që kemi në dorë për t’u rikthyer Shkodrën shkodranëve!