S’patëm vendim, Merkel: Disa vende kundërshtuan çeljen e negociatave me Shqipërinë!
Pasi Presidenti në ikje i Këshillit Evropian, Donald Tusk, pranoi se “disa vende anëtare” të bllokut nuk kanë qenë të gatshme të lejojnë fillimin e negociatave të anëtarësimit në BE me Maqedoninë e Veriut dhe Shqipërinë, dhe Presidenti në ikje i Komisionit Evropian, Jean Claude Juncker, tha se është “thellësisht i zhgënjyer” nga mungesa e unitetit për zgjerimin dhe se rezultati i debatit është një “gabim historik”, Kancelarja e Gjermanisë, Angela Merkel, sqaroi se Samiti nuk kishte vendim në mungesë të konsensusit por kishte disa vende të BE-së që kundërshtuan çeljen e negociatave me Shqipërinë.
Kancelarja Merkel ishte e ndërgjegjshme se ky vendim i BE-së do të shkaktojë zhgënjim mes dy vendeve të Ballkanit Perëndimor, por ajo mirëkupton edhe qëndrimin e Presidentit Macron për reformimin e sistemit të zgjerimit të Bashkimit Europian
“Janë disa vende që kanë rezerva për hapjen e negociatave. Ne kemi diskutuar për këtë, problemi është se cili do të jetë efekti nëse hapen negociatat. Patjetër që do të zhgënjehen si kryeministri i Maqedonisë së Veriut dhe Shqipërisë. Unë fola me Zaev, por e mbështes në një pikë Macron sa i përket procesit ë zgjerimit që duhet reformuar.
Kemi rënë dakord për disa gjëra që duhen bërë ne vërtetë dëshirojmë që të ndodhë hapja e negociatave. Maqedonia e Veriut ka bërë shumë sa i përket hapjes së negociatave. Ndryshimi i emrit ka qenë një progres i madh, por edhe Shqipëria ka bërë progres, por nuk na ka bërë ende që të marrim një vendim unanim, ka pasur ndasi sa i përket një vendimi të përbashkët.
Bëhet fjalë për hapjen e negociatave të Shqipërisë dhe jo për anëtarësim, ata patjetër që duhet të përballen me disa kushte që ne kemi vendosur, në Shqipëri vazhdon të ketë probleme, përfshirë edhe emigrimin, megjithëse Shqipëria ka bërë maksimumin sa i përket kësaj çështje. Në fakt kur bëjmë premtime, patjetër që duhet t’i mbajmë dhe nuk duhet t’u kthejmë shpinën vendeve ndërkohë që bëjmë premtime. Në fakt janë disa faza sa i përket anëtarësimit në BE,” tha Kancelarja Merkel duke i dhënë fund edhe lajmeve nga më të ndryshmet lidhur me vendimin e Këshillit Evropian:
“Nuk patëm vendim. Nga vendet e BE-së pati disa vende që e kundërshtuan hapjen e negociatave për Shqipërinë!”
Çelja e negociatave me Bashkimin Europian pritet të kthehet në agjendën e BE-së në Samitin e Zagrebit kushtuar Ballkanit perëndimor, në maj të vitit 2020 ndërsa epilogu nuk është se do të varet nga Presidenti i Francës, Emmanuel Macron, i cili sot kundërshtoi çfarëdo vendimi pozitiv për Shqipërinë dhe Maqedoninë e Veriut.
