“Spitalet në kolaps”, Rama: Ti synon panikun, kjo sjellje mizerabël do të kthehet mbrapsht

Pas deklaratë së Kryetarit të PD, Lulzim Basha, se spitalet janë në kolaps dhe Kryeministri nuk bën asgjë vetëm sa ju merr shqiptarëve lekët e taksave dhe ju jep miqve të vet, ka reaguar Edi Rama duke e cilësuar si synim për të krijuar panik dhe çoroditje me dizinformimet e përditshme.

“Lulëzim është jo vetëm e kotë po edhe e ulët rrekja jote për ta bërë Covidin pjesë të frontit qesharak opozitar! Kjo luftë është e vështirë për çdo shtet, s’ka si të jetë e lehtë për Shqipërinë, por spitalet Covid nuk janë aspak në kolaps siç predikon ti dhe lufta vazhdon papushim!” thekson Edi Rama në reagimin e tij përmes rrjetit social Twitter, i bindur se kjo sjellje do ti kthehet mbrapsht.

“Ti synon panikun dhe çoroditjen me dizinformimet e përditshme, por kjo sjellje mizerabël prej kalamai të llastuar që do me çdo kusht lodrën e vet, do të të kthehet mbrapsht si një shuplakë më shumë nga ky popull që nuk e bën dot për budalla, as ti, as Mona,as Likja e as Saliu!”

Ndryshe, sot Kryetari i PD, Lulzim Basha, pasi konstatoi se dje kishim mbi 500 raste të reja të raportuara të koronavirusit në Shqipëri, numër ky rekord që nga fillimi i pandemisë, tha se Edi Rama nuk bën agjë dhe nuk ka asnjë plan, por ju merr shqiptarëve lekët e taksave, dhe në vend që ti investojë në shëndetësi, jua jep miqve të vet.