Sqarohet Edi Rama/ Ata që u bënë bajat e kuptuan, antikosovar lindë nuk bëhesh!

Ndonëse e kishte për qëllim të sqarohet me të gjithë ata që e cilësuan si “tradhëtar” pas Samitit të Tiranës, për siç e tha vetë Presidenti i Serbisë, Aleksandar Vuçiç idenë e tij “Mini Shengen”, Edi Rama edhe pse shkronjës i mirë i letrave shqipe, u tradhëtua nga të shkruarit dhe mënyra e arsyetimit.

Me gjuhën shqipe të kosovarëve nuk tallesh kur të emërojnë ministër Kulture, kryetar bashkie, kryetar i PS ose kryeministër, aq më shumë kur i thua vetes ortodoks e me raste edhe katolik, aq më shumë në një ditë feste si ajo e Krishtlindjes. Por ja që Edi Rama ndër të tjera me përbuzje përdor në arsyetimin e tij përmes rrjetit social Facebook, shprehjet si “bërllog” dhe “Vuqiq” terma këto që nuk përdoren asgjëkundi përveç se në Kosovë.

“Atyre që u bënë bajat duke sharë e mallkuar pa hesap këtu këto ditë, në emër të Kosovës sipas tyre, dy fjalë po u them: Më së pari, sinqerisht uroj edhe për ju gëzuar Krishtlindjet e Vitin e Ri! Ju kam ndjekur me keqardhje në rrekjen tuaj, për të më kryqëzuar si “tradhëtar”, “të shitur”, “bërllog”, madje “qen i keq” e bile edhe “djall” dhe çfarëdo tjetër gjuhës suaj, lëshuar pa fre i ka ardhur për mbarë. Faleminderit! Tani një pyetje po ju bëj, si “vëllau i Vuqiqit”, juve o “atdhetarë”, që atdheun e dini në këto raste thikë në majë të gjuhës, për të prerë dhe mundësisht për të vrarë: Si mendoni Ju, “vëllaut tim” serb i pëlqen më shumë që Kosova të vijë në tryezë a të mos vijë?” thotë në reagimin e tij dukshëm i zemëruar Edi Rama duke i kujtuar të ngjashmëve shprehjen e çuditshme “bërllog” por jo edhe “Vuqiq”!

Ndonëse na ka mërzitur se sa shumë e adhuron gjuhën shqipe, “Vuqiq” nuk shkruhet siç e thonë kosovarët sipas tij, por as “Vuçiç” siç e imponuan antikosovarët me standardin absurd të gjuhës shqipe, por është thjeshtë: Вучић! Nëse i hanë kujt meraku ta shqipëroi, atëherë është “Vuçiq” pavarësisht nëse është vëllau i tij, siç është shprehur vetë Edi Rama dhe jo kosovarët, ose është “Vuçiqi peder” siç shprehen më shumë se gjysma e Serbisë. 

Dhe jo vetëm kaq! Kur fillon pastaj dhe e bënë liderin global, atëherë dëshmon se ai nuk e ka problem vetëm çështjen e gjuhës. Duke pyetur kosovarët se si mendojnë, “vëllaut tij” serb i pëlqen më shumë që Kosova të vijë në tryezë a të mos vijë, u jep dhe përgjigje që të mos lodhen: Të mos vijë fare!

“Duke mos ardhur në tryezë Kosova nuk flet dot, nuk dëgjohet dot, nuk ndikon dot dhe as nuk fiton dot asgjë! Ndërsa piskamat Tuaja ndaj meje, i dëgjoj unë jo ai! Madje askush tjetër, as Shtetet e Bashkuara e as Bashkimi Europian, që e mbështesin pa rezervë atë tryezë dhe e duan Kosovën bashkë me të gjithë në tryezë, nuk i dëgjojnë ato piskama dhe hiç aspak mirë nuk mendojnë për mungesën e Kosovës,” thotë Edi Rama duke shtuar se nuk ishte hero kur shkoi në Beograd dhe tha mu në Pallatin e Serbisë, shqip, atë që mendoja e që mendoj sot e gjithë ditën për Kosovën. Kosova është shtet sovran dhe Serbia duhet ta njohë si shtet, sepse është edhe në të mirën e saj të çlirohet nga fantazmat e të shkuarës. Pikë!

Presje, kush i tha se ishte hero, thoni Ju lexuesit e shkronjësit të shquar dhe jo vetëm?! Pikërisht këta që i thanë pas Samitit në Tiranë “tradhëtar” sepse të tjerët, para dhe pas Beogradit ashtu si edhe para e pas Samitit ishin të qartë se ishte i tillë.

“Deri dje, pa u hapur ky proces që sharjet, mallkimet e fabrikimet harrojeni se e ndalin, Shqipëria dhe Kosova s’kishin asnjë shans që ta hapnin kufirin mes tyre. Zero! Sot kjo është një mundësi reale pikërisht sepse edhe “vëllau serb”, siç e quani ju Presidentin e Serbisë, kur kujtoni se po më qëlloni për vdekje me gjuhën e bërë thikë, e ka pranuar lirinë e lëvizjes së njerëzve në rajon si një prej qëllimeve madhore të tryezës. Pa kushte! Që do të thotë se kur ne të hapim kufirin mes Shqipërisë e Kosovës, nuk ngrihet dot as ai dhe as kushdoqoftë tjetër, të verë kujën për rrezikun e “Shqipërisë së madhe,” thotë Kryeministri Edi Rama pa i ditur apo duke i kaluar disa gjëra elementare që tashmë edhe injorantët antikosovarë i dinë:

-Në vitin 1998 të gjithë miqtë që i konsideron Edi Rama duke përfshirë edhe atë të Brukselit, Majlinda Bregu, e thoshin me zë se çirimi i Kosovës nga Serbia kishte shans, Zero! E Pavarësia e Kosovës shumë ZERO, por ja që Kosova u çlirua nga Serbia dhe u bë shtet i pavarur!

-Sikur krimineli i luftës Aleksandar Vuçiç të kishte probleme me gjumin për shkak të lirisë së lëvizjes që nuk e kanë popujt e Ballkanit as ndër vete, do ta lejonte fillimisht lirinë e lëvizjes për Nënat e Srebrenicës të cilat edhe sot kur shkojnë në varrezat e të afërmve të tyre që i vrau qeveria serbe ku ministër ishte Aleksandar Vuçiç, duhet të marrin leje nga pushteti lokal serb.

-Këtë habitoren me kosovarët pse Edi Rama nuk e bënë me boshnjakët por vazhdon e pretendon se e njeh Vuçiçin më mirë se ata, dhe nuk pyet veten e madje as kosovarët, ç’janë këta boshnjakët që kanë lirinë e lëvizjes në Zonën Schengen dhe nuk lëvizin dot brenda shtetit të tyre, apo më saktë territorin që kontrollohet nga ideatori i Mini Shengenit, Aleksandar Vuçiç, dhe quhet Republika Srpska!

-Dhe, në fund, Edi Rama flet se si do ta hap kufirin mes Kosovës dhe Shqipërisë ndërkohë për 6 vjet sa ishte në pushtet kosovarëve u shtoi edhe një kufi ose traun e Qet Kastratit. Broçkullat për mirëmbajtjen e rrugës nuk i ha më askush përderisa mirëmbahen rrugët edhe në drejtim të Greqisë, Maqedonisë dhe Malit të Zi, dhe Kastrati ende nuk ka vënë kufi me ose pa PPP.

Sot Kryeministri Edi Rama e la me kaq, dhe mirë bëri se është ditë Krishtlindjesh ndërsa e mbylli me një përqafim për të gjithë, për veten e për Kosovën dhe krejt kombin tonë natyrisht!

Kaq sepse shqiptarët tashmë e kanë të qartë pavarësht nëse u vihet trau i Qet Kastratit apo akciza e patates kosovare, me ose pa Enver Hoxhën, me ose pa Mini Shengen, antikosovar lindë dhe nuk bëhesh!

Ja reagimi i plotë:

ATYRE QË U BËNË BAJAT duke sharë e mallkuar pa hesap këtu këto ditë, në emër të Kosovës sipas tyre, dy fjalë po u them:

Më së pari, sinqerisht uroj edhe për ju gëzuar Krishtlindjet e Vitin e Ri!

Ju kam ndjekur me keqardhje në rrekjen tuaj, për të më kryqëzuar si “tradhëtar”, “të shitur”, “bërllog”, madje “qen i keq” e bile edhe “djall” dhe çfarëdo tjetër gjuhës suaj, lëshuar pa fre i ka ardhur për mbarë. Faleminderit!

Tani një pyetje po ju bëj, si “vëllau i Vuqiqit”, juve o “atdhetarë”, që atdheun e dini në këto raste thikë në majë të gjuhës, për të prerë dhe mundësisht për të vrarë:

Si mendoni Ju, “vëllaut tim” serb i pëlqen më shumë që Kosova të vijë në tryezë a të mos vijë?

Ju’a them unë që mos lodheni ta mendoni: Të mos vijë fare!

Sepse duke mos ardhur në tryezë Kosova nuk flet dot, nuk dëgjohet dot, nuk ndikon dot dhe as nuk fiton dot asgjë! Ndërsa piskamat Tuaja ndaj meje, i dëgjoj unë jo ai! Madje askush tjetër, as Shtetet e Bashkuara e as Bashkimi Europian, që e mbështesin pa rezervë atë tryezë dhe e duan Kosovën bashkë me të gjithë në tryezë, nuk i dëgjojnë ato piskama dhe hiç aspak mirë nuk mendojnë për mungesën e Kosovës.

Mua mallkimet e ofendimet Tuaja, sado Ju të hidheni përpjetë, nuk më bëjnë dot as tradhëtar e as Esat Pashë, ashtu sikundër lëvdatat e komplimentat në raste të tjera, nuk më bëjnë hiç asfare, as hero e as Ismail Qemal! Unë nuk isha hero kur shkova në Beograd dhe e thashë mu në Pallatin e Serbisë, shqip, atë që mendoja e që mendoj sot e gjithë ditën për Kosovën. Kosova është shtet sovran dhe Serbia duhet ta njohë si shtet, sepse është edhe në të mirën e saj të çlirohet nga fantazmat e të shkuarës. Pikë!

Kur u nisa atëherë për Beograd nuk latë fjalë të ulët pa më thënë. Kur u ktheva nga Beogradi, nuk latë lëvdatë të tepërt pa më dhënë. Po për mua ishte njësoj, sepse unë isha i njëjti edhe kur shkova edhe kur u ktheva, siç jam edhe sot. E njësoj si atëherë edhe sot, unë bëj atë që kam bindje se është e drejtë për vendin e për kombin tonë. Thjesht si shqiptar jo si hero, as si tradhëtar jo e jo!

Lëvdatat e sharjet e rastit, nga një vesh më hyjnë e nga tjetri më dalin të them të drejtën. Jam mësuar me to dhe e di mirë që koha dhe historia nuk lexojnë gazeta e portale, as nuk ndikohen nga analistë e nga rrjete sociale. Dhe koha e historia do të flasin nesër drejtë, e do t’u japin hakun të drejtëve dhe të shtrembërve të sotëm. Të tjerat janë llafe të sotme që i merr era e nesërme.

Deri dje, pa u hapur ky proces që sharjet, mallkimet e fabrikimet harrojeni se e ndalin, Shqipëria dhe Kosova s’kishin asnjë shans që ta hapnin kufirin mes tyre. Zero! Sot kjo është një mundësi reale pikërisht sepse edhe “vëllau serb”, siç e quani ju Presidentin e Serbisë, kur kujtoni se po më qëlloni për vdekje me gjuhën e bërë thikë, e ka pranuar lirinë e lëvizjes së njerëzve në rajon si një prej qëllimeve madhore të tryezës. Pa kushte! Që do të thotë se kur ne të hapim kufirin mes Shqipërisë e Kosovës, nuk ngrihet dot as ai dhe as kushdoqoftë tjetër, të verë kujën për rrezikun e “Shqipërisë së madhe”.

Kur të krijohet qeveria e re e Kosovës dhe të ulemi në tryezë për të vijuar bashkëpunimin, tash po e shihni vetë çka sot po ju’a shpjegoj e rishpjegoj më kot, duke marrë mbrapsht ato që hidhni mbi mua kot më kot. Dhe kur Kosova, herët a vonë, të ulet nesër njësoj si Shqipëria në atë tryezë, se s’ka kah shkon tjetër përveçse nga e ardhmja, bashkë me Shqipërinë, tash e shohim kush ka të drejtë, unë apo ju.

Sot e lemë me kaq, se është ditë Krishtlindjesh dhe po e mbyll me një përqafim për të gjithë ju nga unë, që vëllazërisht ju uroj çdo të mirë me këdo ju do zemra, e sa më shumë dritë në shpirt e në mendje secilit prej jush, për veten e për Kosovën dhe krejt kombin tonë natyrisht