Sqarohet/ Edi Rama e don Lulzim Bashën në Komitet për tu tallur: “Qamet, ushqim për buzëqeshjen!”

Të zgjohesh në orën 07:00 për të drejtuar një Mbledhje të Qeverisë që e konsideron të jashtëzakonshme pas situatës së krijuar me tërmetin shkatërrimtar të 26 Nëntorit, vetëm për tu tallur me rivalin politik duhet të quhesh Edi Rama. Ndryshe, nuk ka mundësi të ndodhë me asnjë Kryeministër si në luftë ashtu në paqe, si në gjendje emergjence ashtu dhe në festë!

Sot, në spektaklin e radhës të orës 07:00 meqë nuk po lexon shtypin e ditës për ERTV, që të paktën të bëjë një punë, Edi Rama bëri të ditur se do të ndërtoj lagje për të dëmtuarit nga tërmeti shkatërrimtar dhe për çudinë tashmë të asnjë qytetari, edhe këtë lagje e pagëzoi të rilindjes. Meqë kabineti I tij ende nuk e kishte marrë veten iu kujtoi se kanë dhe një rival politik që do të vijë në pushtet, dhe nxitoi ti kthej përgjigje, siç din vetëm kryerilindasi komunist, duke u tallur me Planin 3-pikësh për të cilin foli dje Lulzim Basha.  

Ndonëse i bënë thirrje në çdo sekondë të jetë pjesë e Komitetit Kombëtar të Rindërtimit, vetëm sot  sqarua se Lulzim Bashën e don vetëm për ta tallur ashtu siç bëri dhe tre pikat e planit të tijë, për të cilat tha se janë absolutisht një ushqim për buzëqeshjen, se nuk dëshiron të thotë gajasjen sepse si “i kujdesshëm” që është, nuk do që të ndjehen keq kolegët e opozitës.

 “Për fat të keq opozita që pretendon të qeverisë vendin, jo vetëm nuk ka pranuar ende të ulet në tryezë për të diskutuar gjërat, ne jemi gati, e në rast se idetë e tyre janë më të mira do marrim të tyret se këtu nuk është situatë që të grindemi se kush e ka idenë më të bukur, këtu duhet te bëhet me e mira për njerëzit. Por deri tani jemi njohur me tre pika që do të qenkëshin zgjidhja dhe është një komponent i ekranit të madh të ngjarjes ku fillon dita duke qarë e vazhdon duke qeshur, e kthehet duke u pezmatuar pastaj duke buzëqeshur, gajasur e duke qarë prapë dhe këto tre pika janë absolutisht një ushqim për buzëqeshjen se nuk dua të them gajasjen se nuk dua të ndjehen keq kolegët e opozitës, por të thuash që të mblidhen 500 inxhinierë pika e parë, tani pse jo 600, pse jo 450. Pika e dytë, të bëhet identifikim i dëmeve, por po bëhet, kjo ka qenë gjëja e parë, kemi ngritur në këmbë dynjanë dhe është bërë Durrësi sikur është lagjja para OKB ku sheh të gjitha llojet e racave dhe gjuhëve. Pastaj pika e tretë është qamet, të mos financohen oligarkët, dmth vazhdon loja, dhe 150 mln që do marrin oligarkët ti marrë populli, po ça janë këto para që u dashka ti spostojmë nga këto, dmth të ndalojmë kontrollin shëndetësor bazë falas,” tha Edi Rama duke vazhduar ta bëjë analistin anti-berishë të viteve ’90-të siç bënte te “Koha Jonë”, thuajse Lulzim Basha është në pushtet dhe jo vetë ai! Dhe pasi e bënë leckë, pa pasur nderin që për zhelesh ta nxjerrë jashtë nga Komiteti, ai i bënë sërish ftesën Lulzim Bashën dhe opozitës për të qenë pjesë e një tryeze të përbashkët.

“Unë i mirëkuptoj, kanë edhe ata probleme nga tërmeti, por i përsëris ftesën për të qenë bashkë në një tryezë!”

Por ky spektakël i “pasqyrës së shtypit” në ERTV nuk përfundoi me Lulzim Bashën dhe opozitën. Foli për rindërtimin e zonave të goditura në planin afatshkurtër dhe afatmesëm, por jo pa politikë edhe në këtë ambicie. Siç e bastardoi Partinë Socialiste, bëri të ditur se do të ndërtoi lagje të rilindjes.

“Ndërtimi i disa qytezave të reja dhe objektivi im është të arrijmë në një program rindërtimi që të jetë krenari kombëtare, jo banesa sociale të tipit që kemi njohur deri tani. Banesa që bëhen për të varfrit dhe e kanë të shkruar në ballë gjithë jetën që janë shtëpitë e të varfërve por të ndërtojmë në Durrës një lagje komplet të re që të jetë më e bukura e Durrësit pas ‘90 pa diskutim, ky është objektivi im, lagje e re nga e para me infrastrukturë, kanalizime, ujësjellës me kopsht, çerdhe, shkollë me mjedise publike e banimi.”

Për Tiranën, Edi Rama tha se është në diskutim një skenar për një lagje të re të madhe, dhe një skenar për të ndërtuar dy më të vogla.

“Do ta shtrojmë këtë çështje në një konsultë që po bën ministria e Kulturës me arkitektë dhe urbanistë të huaj që janë vënë në dispozicion për konsulencë vullnetare dhe shumë shpejt do të dalim me rezultate,” tha Kryeministri ndërsa për Kurbin tha se do të shembem pallatet që u konstatuan të dëmtuara dhe do të bëhet një lagje e re.

“10 mijë apartamente në tërësi në projekt afatgjatë dhe në afatshkurtër 5 mijë apartamente. 10 mijë sepse kështu mund të përfshijmë jo vetëm ata që janë direkt të prekur por edhe të tjerë që janë me probleme sociale e me radhë, por edhe për një skemë që të  mos bëjmë gabimin e bërë në vende të tjera në periferitë e kryeqyteteve evropiane, ku ndërtimi i lagjeve të reja krijoi vatra njerëzish të margjinalizuar të ndarë nga pjesa tjetër dhe tensione të vazhdueshme, si në Francë.”

Rindërtimi në zonat e prekura nga tërmeti nuk kthehet në sfidë që të rindërtojmë këtë që u detyrohemi këtyre njerëzve dhe të godasim pjesën tjetër të popullsisë duke goditur ekonominë, tha Edi Rama, por sfida është që te bëhen të dyja, të sistemohen njerëzit dhe të mos preken parametrat e buxhetit dhe të mos hiqet dore nga objektivi për rritjen ekonomike.

“Ne do të kalojmë si fazë të parë nga buxheti i 2020, 0.4% të PBB duke u siguruar që deficiti primar pozitiv të mbetet pozitiv, asnjë ndryshim parametrash që mund të kërcënojë qëndrueshmërinë e gjithë sistemit makroekonomik. Po studiohet edhe cilat fonde mund të transferohen. Ka një zë që lidhet me të gjitha shpenzimet, në vitin e ardhshëm nuk do të blihet asnjë makinë, nuk do të pajisjet asnjë zyrë, nga ato që kanë qenë rutina dhe do të bllokohen blerjet e makinave, dollapëve, kolltuqeve, TV-ve në të gjithë bashkitë e vendit. Kush do të jetë keq për makinë të gjejë një kalë edhe nuk ka problem, kryetar bashkish me kuaj do të ishin një inovacion ekologjik. Edhe sidomos kryetarët e njëzive administrative do të ishin të mirëseardhur në komunitet, që të mos lëvizin me vetura neper qendrat e qyteteve.”

Me Kryeministër me çitjane dhe Kryebashkiak në kalë, nga “pasqyra e shtypit” e ERTV, Edi Rama u premtoi shqiptarëve transparencë.

“Kush do që të dijë se cfarë po shpenzohet mjafton të klikojë dhe të shikojë cdo lek të shpenzuar, ju lutem kjo është e domosdoshme për transparencën.”

Ndërkohë sqaroi se ku do të jenë “Lagjet e Rilindjes”:

“Në pranverë duhet të jemi në kantier në lagjen e re të Durrësit, në Tiranë kur të zgjedhim nëse do të jenë dy apo një lagje. Një lagje e vetme do të ishte pranë Kasharit në hapësirën kur është hapësira e një zone të re ekonomike. Dy lagje do të ishin një në Kombinat tjetra te Uzina e Autotraktorëve në Shkozë dhe lagja e re në Laç. Në Laç të fillojë shembja e atyre pallateve që tani. Ndihmoni njerëzit të marrin ato që kanë brenda dhe pastrojini. Në Tiranë dhe Durrës zonat e identifikuara janë hapësira shtetërore. Edhe në Kombinat të fillojë shembja e pallateve të tjera, që i kanë dhënë Shqipërisë shumë figura të njohura dhe qeverisë Erjon Braçen.”