Sri Lanka, 7 kamikazë në 3 kisha vrasin 290 persona. Ja përbërja fetare e…
Pas sulmeve të 7 kamikazëve në 3 kisha dhe 3 hotele në Sri Lanka ku mbetën të vrarë 290 persona, policia ka arrestuar 24 persona, kanë bërë të ditur autoritetet lokale që sot konfirmojnë se pas këtyre sulmeve të tmerrshme qëndron lëvizja islamike National Thowheeth Jama’ath, NTJ.
Zëdhënësi i policisë, Ruwan Gunasekara tha se personat e arrestuar janë nga zona lokale, dhe janë duke u marrë në pyetje nga Departamenti për vepra penale.
Sot në mëngjes është hequr ora policore, shkollat kanë vazhduar të jenë të mbyllura ndërsa qeveria ka paralajmëruar orë të re policore duke filluar nga ora 20:00. Për të kufizuar lëvizjen në këtë vend me 21 milionë banorë, janë shpallur dy ditë pushim, por sot janë vërejtur edhe punëtorë duke shkuar në punë.
Kryeministri Ranill Wickremesinghe ka kërkuar ndihmë nga jashtë, në mënyrë që të zbulohet nëse sulmuesit kishin lidhje me terrorizmin ndërkombëtar sepse shefi i policisë së Sri Lankas, Pujuth Jayasundara para dhjetë ditësh kishte alarmuar forcat e sigurisë për sulmet e mundshme të kamikazëve në kisha.
“Një shërbim i huaj sekret na ka informuar se NTJ po planifikon të kryej sulme kamikaze, ku në shënjestër kanë kishat e njohura dhe ambasadën indiane në Colombo,” thekson Jayasundara.
Katolikë dhe Myslimanë ka shumë pak
E gjithë bota është tronditur nga sulmet terroriste të shumë kishave katolike, pikërisht në ditën e Pashkëve. Është folur shumë edhe për terrorizmin islamik dhe rivalitetin fetar në mes të katolikëve dhe myslimanëve që sot është aktual në botë. Por sa ka vend kjo luftë në Sri Lanka, aty ku si katolikët edhe myslimanët janë pakicë.
Në Sri Lanka jetojnë rreth 1.5 milionë katolikë. Sipas regjistrimit të popullsisë të vitit 2012, vetëm 7 për qind e popullsisë janë katolikë.
Feja e cila dominon në Sri Lanka është budizmi, me rreth 70.2 për qind e popullsisë, hindusë janë 12.6 për qind dhe myslimanë janë vetëm 9.7 për qind e popullsisë .
Përkundër kësaj përbërje fetare të popullsisë, pas shpërthimeve në 3 kisha në Nogombo, Batticalo dhe Colombo, dhe 3 hotele luksoze në Colombo, autoritetet konfirmojnë se pas sulmit qëndron lëvizja islamike National Thowheeth Jama’ath, NTJ, e cila ka vepruar përmes një rrjeti terrorist ndërkombëtar, tha zëdhënësi i Qeverisë, Rajitha Senaratne.
Ndërkohë Agjencia e lajmeve “France presse” raporton se vazhdojnë hetimet për të përcaktuar lidhjet e mundshme të NTJ me grupimet terroriste ndërkombëtare.
Por zëdhënësi i Qeverisë, Senaratne, për Agjencinë e lajmeve “Reuters” tha se për realizimin e këtij sulmi ka ndihmuar një rrjet ndërkombëtar.
“Nuk besojmë se këto sulme i ka kryer një grup njerëzish i cili vepron brenda këtij shteti,” tha zëdhënësi i Qeverisë, Rajitha Senaratne i bindur se pa ndihmën nga jashtë sulmet nuk do të kishin sukses.
