Stafi mjekësor në rrezik/ Denoncimi, PD: MSH ka shpërndarë 1.2 milionë maska të skaduara!
Përfaqësuesit e Grupit të Punës pranë Partisë Demokratike për monitorimin e situatës me koronavirus, Gazment Bardhi, Albana Vokshi dhe Bardh Spahia, gjatë inspektimit të masave të marra në Qendrën Shëndetsore të Kamzës kanë konstatuar se 1 milion e 200 mijë maskat e shpërndara nga Ministria e Shëndetësisë janë të skaduara që nga 20 dhjetori i vitit 2011.
”Ministria e Shëndetësisë ka shpërndarë për stafin mjekësor maska mbrojtëse që janë këto kutia. Nga data 28 deri më sot kemi marrë denoncime nga mjekë që janë shpërndarë me propagandë 1 milion e 200 mijë maska.
Kemi marrë denoncim që nga përdorimi i këtyre maskave kanë pasur irritim në fyrytë. Kemi verifikuar problemin që çonte dhe në probleme me frymëmarrjen. Njihemi me një fakt tronditës të papërgjegjshmërisë së qeverisë dhe akt kriminal,” tha Sekretari i PD, Gazment Bardhi duke demonstruar dhe bllokimin që i është bërë datës së skadencës:
“Këto kutia kanë një pullë që ka bllokuar datën e skadencës. Nëse e heq sheh që data e skadencës është 20 dhjetor 2011. Kjo tregon që Ministria e Shëndetësisë dhe të gjitha institucionet janë përfshirë në nëj veprimtari kriminale.
Këto nuk janë mjete mbrojtëse mjekësore por mbetje shëndetësore që duhet të asgjesoheshin. Mjekët janë të pambrojtur dhe i rrezikohet shëndeti. Për këto maska janë paguar edhe para dhe Ministria është përshirë në një krim të manipulimit duke i vendosur në dispozicion mjekëve mbetje,” tha Bardhi duke i bërë apel Prokurorit të Përgjithshëm nga qendra shëndetësore e Kamzës:
“Prokurori i Përgjithshëm, ky është një krim i rëndë, me përgjegjëse ministren e Shëndetësisë për t’i dhënë mjekëve mbetje. Sot gjithë shqiptarët i kanë sytë nga mjekët dhe personi mjekësor. Cënimi i jetës së tyre është cënim për jetën e gjithë qytetarëve. Kërkuam marrjen e masave edhe në vendin tonë. Ka nevojë për përgjegjshmëri, përulësi dhe fonde për të pajisur mjekët. S’ka nevojë për propagandë dhe shfaqje.”
Ndërkohë nuk ka munguar as apeli për Qeverinë në mbrojtje të stafit mjekësor:
“Qeveria të lërë propagandën dhe të mbrojë stafin mjekësor. I bëj thirrje Prokurorit të Përgjithshëm që në këtë moment pa asnjë vonesë të urdhërojë të gjithë prokuroritë e rretheve të sekuestrojnë këto kuti të skaduara të mjeteve spitalore që mjekëve i janë dhënë për të përballuar situatën me koronavirusin.
Në përgjegjësinë tonë për të denoncuar çdo gjë që cënon jetën e personelit mjekësor dhe të gjithë qytetarëve.”
